Увс аймаг байгуулагдсаны 100 жилийн ойн хүрээнд Монгол Улсын XX зууны түүхэнд онцгой байр суурь эзэлдэг төр, нийгэм, цэргийн нэрт зүтгэлтэн, БНМАУ-ын Маршал Юмжаагийн Цэдэнбалын амьдрал, үйл хэрэгт зориулсан дурсгалын үзэсгэлэн өнөөдөр нээлтээ хийлээ.

Нам, төрийг 44 жилийн турш удирдсан тэрбээр Монгол Улсын тусгаар тогтнолыг бататган бэхжүүлэх, улс орныг шинэчлэн хөгжүүлэх үйлсэд үнэтэй хувь нэмэр оруулсан түүхэн гавьяатай билээ.

Түүний эдэлж хэрэглэж байсан хувийн эд зүйлс, архивын ховор баримт, гэрэл зургууд болон түүхэн дурсгалууд үзэсгэлэнд дэлгэжээ.

Үзэсгэлэнгийн нээлтийн ажиллагаанд Зэвсэгт хүчний Жанжин штабын орлогч дарга, бригадын генерал Б.Баатар, аймгийн удирдлагууд болон түүх, соёлын салбарын төлөөлөл оролцож, түүний төрсөн нутгийн ард иргэдэд хүндэтгэл илэрхийллээ.

Мөн ЗХЖШ-ын Үлгэр жишээ үлээвэр найрал хөгжим, Төрийн хүндэт харуулын бүрэлдэхүүн ойн баярт уур амьсгал нэмж, аймгийн төв талбайд үлээвэр хөгжмийн тоглолтыг толилууллаа.