Монгол Улсад өнөөдрийн байдлаар 160 гаруй хувийн бага, дунд сургууль үйл ажиллагаа явуулж байгаа бөгөөд эдгээр сургуульд 40 мянган сурагч суралцаж байгаа юм. Хувийн дунд сургуулиудын төлбөр жилээс жилд нэмэгддэг нь нууц биш. Энэ жилийн хувьд мөн адил хамгийн багадаа 400 мянган төгрөгөөс 1.5 сая хүртэл нэмэгдсэн байна. 

Цар тахлын халдвартай холбогдуулан энэ жил бүх сургуулиудын танхимын сургалтыг түр хугацаанд зогсоож, хичээлийг нь цахимаар явуулах шийдвэр гарсан билээ. Хувийн сургуульд нэг жилийн сургалтын төлбөрөө нэгэнт тушаасан эцэг эхчүүдийн хувьд хохиролтой байгаагаа илэрхийлж, төлбөрийг буцааж эсвэл дараагийн жилд төлбөрийг шилжүүлэх хүсэлтэй байгаа илэрхийлсэн. Харин сургуулийн захиргааны зүгээс буцаан олгох боломжгүй гэх мэт асуудал гарч, олон нийтийн дунд багагүй бухимдал үүссэн. Үүнтэй холбогдуулан БШУЯ-наас энэ хичээлийн жилд хувийн хэвшлийн боловсролын байгууллагыг төлбөрөө сар эсвэл улирлаар авах саналыг Монголын хувийн хэвшлийн бага, дунд сургуулиудын холбоонд хүргүүлэв. 

Энэ талаар тодруулахаар Монголын хувийн дунд сургуулиудын холбоотой холбогдоход "Манай холбооны төлөөлөл энэ асуудлаар БШУЯ-тай уулзалт хийж байгаа. Багш нар ажилдаа орж, сургуулиуд үйл ажиллагаагаа дөнгөж сэргээж байгаа учир одоогийн байдлаар сургуулийн удирдлагатай уулзаж амжаагүй байна. Манай холбоонд 80 гаруй хувийн сургууль хамрагддаг. Сургалтын төлбөрийн асуудлын тухай сургуулийн захиргаа болон эцэг эхийн хооронд байгуулсан гэрээний дагуу шийдвэрлэгдэж явах байх. Гэхдээ одоогийн байдлаар ямар нэгэн хариу гараагүй" гэсэн хариултыг өглөө.

Ингээд зарим хувийн дунд сургуулиудын 2020-2021 оны хичээлийн жилийн бага, дунд, ахлах ангийн сургалтын төлбөрийн мэдээллийн хүргэе.

INTERNATIONAL SCHOOL OF ULAANBAATAR

Монголын хамгийн өндөр үнэтэй олон улсын дунд сургууль. Тус сургуулийн давуу тал нь 1 дүгээр ангийн сурагчдад монгол хэлнээс бусад бүх хичээл англиар ордог. Түүнчлэн дунд ангиасаа эхлээд хятад, солонгос, испани, франц хэлнүүдээс сонгож хос хэлний хөтөлбөрт хамрагдах боломжтой аж. Сургуулийн бүртгэлийн хураамж 150, сургуулийн хуримтлалын санд 4500 ам.доллар нэмж авдаг. Харин төлбөрийн тухайд 

• Бага анги: 22.100 мянган ам.доллар /62 сая төгрөг/
• Дунд анги: 26.900 ам.доллар /76 сая төгрөг/
• Ахлах анги: 28.700 ам.доллар /81 сая төгрөг/

International school of Ulaanbaatar сургуулиас цар тахлын үед энэ жил сургалтын гэрээгээ дахин сунгаж буй хуучин суралцагч нартаа шинэ хичээлийн жилийн сургалтын төлбөрт нь 25 хувийн хөнгөлөлт үзүүлж байгаа аж. 

BRITISH SCHOOL OF ULAANBAATAR 

Англи Уэльсийн үндэсний хөтөлбөрийг хэрэгжүүлдэг гэгддэг энэ сургууль мөн өндөр төлбөртэй хувийн дунд сургуулиудын тоонд орно. 

• Бага анги /1-6 дугаар анги/: 10.080-14.970 мянган ам.доллар /28-42 сая төгрөг/
• Дунд анги /7-9 дүгээр анги/: 16.680 ам.доллар /47 сая төгрөг/
• Ахлах анги /10-13 дугаар анги/: 17.920-19.350 ам.доллар /51-55 сая төгрөг/

AMERICAN SCHOOL OF ULAANBAATAR 

АНУ-ын Ерөнхий боловсролын систем дээр үндэслэн хөтөлбөрөө явуулдаг “Wasc” байгууллагаас итгэмжлэгдсэн Олон улсын сургууль юм. Энэ жил сургуулийн төлбөр нэг сая төгрөгөөр нэмэгдсэн. 

• Бага анги /1-2 дугаар анги/: Монгол хүүхэд 6000 ам.доллар /17 сая төгрөг/, гадаад хүүхэд 8000 ам.доллар /22.7 сая төгрөг/
• Ахлах анги /3-5 дугаар анги/: Монгол хүүхэд 7000 ам.доллар /19.9 сая төгрөг/, гадаад хүүхэд 9000 ам.доллар /25.6 сая төгрөг/

ХОББИ БҮРЭН ДУНД СУРГУУЛЬ

Монгол улсын анхны хувийн хэвшлийн дунд сургууль болох "Хобби" бүрэн дунд сургууль нь 1994 онд байгуулагдсан. Англи, монгол хэлээр хос сургалтыг нэгдүгээр ангиас явуулдаг. Мөн бага ангидаа IPC /International Primary Cirriculum/, дунд ангидаа IMYC /International Middle Year Cirriculum/, ахлах ангидаа AP /Advanced Placement/ олон улсын хөтөлбөр хэрэгжүүлдэг аж.

• Бүх анги: 15 сая төгрөг 

ЭРЭЛ-THE ENGLISH SCHOOL OF MONGOLIA 

Монголын Англи сургууль нь анх 1998 онд “Олон улсын боловсролын төв"-ийн төслийн хүрээнд байгуулагдсан бөгөөд үүсэн байгуулагдсан цагаасаа эхлэн тэр үеийн хамгийн дээд түвшин болох Оросын сургалтын системээр 13-н жил сургалт явуулж ирсэн бөгөөд 2011-2012 оны хичээлийн жилээс эхлэн The English school of Mongolia (Монголын Англи Сургууль) болон шинэчлэгдсэн юм. ESM нь International Baccalaureate (IB буюу Олон Улсын Дунд Боловсролын Бакалаврын) зэрэг сургалтын системийг нэвтрүүлсэн. 

• Бага анги /1-5 дугаар анги/: 12.5 сая төгрөг 
• Дунд анги /6-8 дугаар анги/: 12.7 сая төгрөг
• Ахлах анги /9-10 дугаар анги/: 13 сая төгрөг
• Ахлах төгсөх анги /11-12 дугаар анги/: 15 сая төгрөг 

ORCHLON INTERNATIONAL SCHOOL 

2001 онд байгуулагдсан Орчлон сургууль нь Монголын анхны хувийн олон улсын сургуулиудын нэг. Монтессори хөтөлбөр, Кембрижийн олон улсын хөтөлбөр, Үндэсний хөтөлбөр зэргийг хэрэгжүүлдэг.

• Бага анги /1-5 дугаар анги/: 18 сая төгрөг 
• Дунд анги /6-8 дугаар анги/: 21 сая төгрөг
• Ахлах анги /9-10 дугаар анги/: 23 сая төгрөг

УЛААНБААТАР ЭЛИТ ОЛОН УЛСЫН ДУНД СУРГУУЛЬ 

"Улаанбаатар Элит" ОУ-ын дунд сургууль нь 2005 онд үүсгэн байгуулагдсан. Тус сургууль нь олон улсын боловсролын Кембрижийн хөтөлбөрийг, Монголын үндэсний боловсролын хөтөлбөртэй хослуулан, сургуулийн өмнөх, бага, дунд, ахлах гэсэн боловсролын бүх шатанд хэрэгжүүлэн цогц сургалтыг явуулдаг.

• Бүх анги: 11.9 сая төгрөг 

"ШИНЭ МОНГОЛ" БҮРЭН ДУНД СУРГУУЛЬ

Тус сургууль нь Японы ахлах сургуулийн сургалтын хөтөлбөрийг сургалтын системдээ тусгаж ашигладаг. Суралцагсдын авьяасыг хөгжүүлэх зорилгоор бүх сурагчдыг дугуйлан, секцэнд хамрагдахыг шаарддаг байна. Нийт 36 төрлийн дугуйлан, секц, клубууд хичээллэдэг. Бүх сурагч дор хаяж 1 дугуйлан, секцэнд хамрагдсан байдаг. Япон хэлийг 6 дугаар ангиасаа эхлэн үздэг байна.

• Бага анги: 4.5 сая төгрөг 
• Дунд анги: 4.6 сая төгрөг
• Ахлах анги: 4.7 сая төгрөг

САНТ СУРГУУЛЬ 

Сант сургууль Оксфордын англи хэлний хөтөлбөртэй. Мөн 7 дугаар ангиас мэдээллийн технологийн хичээл үзнэ. Сант сургууль АНУ-ын Массачүсетсийн Технологийн Институтийн цахим хичээлийг 2013 онд Монгол анх удаа нэвтрүүлж, хосолсон хөтөлбөрийг хэрэгжүүлсэн билээ.

• Бүх анги: 7 сая төгрөг 

ЛОГАРИФМ СУРГУУЛЬ 

Логарифм сургууль 2008 онд байгуулагдсан. Улмаар 2014 онд STEM буюу Science, Engineering, Technology, Art хичээлүүдийн нэгдсэн хөтөлбөртэй болж 4 дүгээр ангиас эхлэн инженерингийн суурь хичээлүүдийг, ахлах ангидаа роботикийн хичээлүүдийг үзэж эхэлжээ.

• Бага анги: 7 сая төгрөг 
• Дунд анги: 7 сая төгрөг
• Ахлах анги: 5.5 сая төгрөг

САКУРА БҮРЭН ДУНД СУРГУУЛЬ 

Монголын анхны хувийн хэвшлийн сургуулиудын нэг “Сакура” бүрэн дунд сургууль 1999 оноос эхлэн үйл ажиллагаа явуулж байна. Математик, япон, англи хэлний гүнзгийрүүлсэн сургалттай Сакура сургууль нь англи хэлний "Grape seed" хөтөлбөрийг хэрэгжүүлдэг.

• Бага анги /1-5 дугаар анги/: 7.5 сая төгрөг 
• Дунд анги /6-9 дүгээр анги/: 8.5 сая төгрөг
• Ахлах анги /10-12 дугаар анги/: 9.5 сая төгрөг

ОЛОНЛОГ СУРГУУЛЬ 

"Олонлог төв" сургууль нь 1993 оноос тогтмол хэвлэгдэж буй математикийн соён гэгээрүүлэх Олонлог сэтгүүлийн мэдээллийн сан, сургалтын технологи болон үзэл санааг дэмжигч хамтран ажиллагсдын багт тулгуурлан 2002 онд анх байгуулагдсан. 

• Бүх анги: 6 сая төгрөг 

ШИНЭ МОНГОЛ ХАРҮМАФҮЖИ СУРГУУЛЬ 

Тус сургууль нь Японы мэргэжлийн сумогийн Их аварга, Харумофүжи Д.Бямбадоржийн “Шинэ Монгол” эрдмийн хүрээлэнтэй хамтран байгуулсан ерөнхий боловсролын сургууль юм. Япон хэв шинжийг сургалтандаа нэвтрүүлсэн, байгаль, нийгмийн ухаанаар төрөлжсөн сургалттай. Англи хэлний "Grape seed" хөтөлбөрийг хэрэгжүүлдэг.  

• Бага анги: 4.7 сая төгрөг 
• Дунд анги: 4.8 сая төгрөг
• Ахлах анги: 4.9 сая төгрөг

GLOBAL INTERNATIONAL SCHOOL 

Кембрижийн олон улсын бүрэн дунд боловсролын Cambridge Advanced (AS) хөтөлбөрийг үндэсний цөм хөтөлбөртэй хослууулан хэрэгжүүлдэг. Гадаад орны ахлах сургуулиудтай хамтран ажиллах, уралдаан, тэмцээнд оролцох, STUDY TOUR  зохион байгуулах зэргээр харилцан суралцах боломжтой. "Сайн үйлийн эзэн” хөтөлбөрөөр хичээллэж, бусдын сайн сайханд хувь нэмрээ оруулдаг, санаачилгатай, бүтээлч сайн үйлийн эзэн болж төлөвшинө. SAT, IELTS, TOFEL, HSK (хятад), NOR (япон) шалгалтад бэлтгэх хөтөлбөр хэрэгжүүлдэг. 

Бүх анги: 10 сая төгрөг

ТӨГСДЭЛГЭРЭХ БҮРЭН ДУНД СУРГУУЛЬ

Тус сургууль 1999 онд математик, гадаад хэлний гүнзгийрүүлсэн сургалттай бүрэн дунд сургууль болон байгуулагдсан. 

• Бага, дунд анги: 3 сая төгрөг 
• Ахлах анги: 3.4 сая төгрөг