Дэлхийн түүхэд зургаадугаар сарын 18-д болсон онцлох гурван үйл явдлыг танилцуулъя.

1812 оны зургаадугаар сарын 18. АНУ тэгисийн хил зөрчсөн Их Британид дайн зарлав

Их Британи АНУ-ын тэнгисийн хилийг зөрчих үед АНУ-ын Сенат шийдвэр гаргаж 1812 оны зургаадугаар сарын 18-д АНУ Их Британид дайн зарлав.

"1812 оны дайн" хэмээн нэрлэдэг энэхүү зэвсэгт мөргөлдөөн нь хоёр жил хагас үргэлжилж 1815 онд Гентийн гэрээгээр өндөрлөсөн.

Гэрээний дагуу дайны өмнөх хилийн шугам, нутаг дэвсгэрийн эзэмшлийг сэргээж Их Британи болон АНУ-ын нөхөрлөл сэргэсэн байна.

1815 оны зургаадугаар сарын 18. Наполеон Ватерлоод ялагдаж Европ дахь ноёрхол нь дуусав

Наполеон Бонапарт 1815 оны зургаадугаар сарын 18-д Бельгийн Ватерлоогийн дэргэдэх тулаанд ялагдсанаар Европод 23 жил үргэлжилсэн ноёрхол нь өндөрлөжээ.

Тулаанд Наполеоны Францын 73 мянган цэрэг Их Британи, Нидерланд, Бельги, Германы 120 мянган цэрэг оролцсон бөгөөд 66 мянга нь амь үрэгдсэн байна.

Тулаанд ялагдсан Наполеон Парис руу буцаж гурав хоногийн дараа хаан ширээнээс татгалзаж Сент Элена арал руу цөлөгджээ.

1979 оны зургаадугаар сарын 18. Зөвлөлт болон Америкийн удирдагчид цөмийн зэвсгийг хязгаарласан SALT-II гэрээг байгуулав

Австрийн нийслэл Вена хотод болсон уулзалтын үеэр АНУ-ын Ерөнхийлөгч Жимми Картер, ЗХУ-ын удирдагч Леонид Брежнев нар 1979 оны зургаадугаар сарын 18-д цөмийн зэвсгийн хязгаарлалтын тухай "SALT-II" гэрээнд гарын үсэг зуржээ.

Гэрээ хүчин төгөлдөр мөрдөгдөөгүй бөгөөд Хүйтэн дайны үеэр хоёр улсын хоорондох хамгийн маргаантай сэдэв байв. 1972 онд байгуулсан SALT-I гэрээнээс үлдсэн асуудлуудыг шийдвэрлэхийн тулд хоёр дахь гэрээг байгуулсан нь энэ аж.

Гэрээ байгуулснаас зургаан сарын ЗХУ дараа Афганистан руу довтолж, АНУ Кубээс Зөвлөлтийн байлдааны бригадыг илрүүлсэн бөгөөд гэрээ хэрэгжихгүй байсаар 1991 онд "START I" гэрээгээр сольсон.