“Хөтөл цемент шохой” үйлдвэрийн нэг тонн задгай цементийн үнэ 184 мянган төгрөг (НӨАТ-гүй үнэ) болж буурчээ. Ингэснээр хамгийн хямд цемент санал болгож байна. Тус үйлдвэрийн захирал Л.Наранбаатар “Энэ хавар барилга барих компаниуд бидэнтэй хамтран ажиллаарай. “МАК цемент” компани цахимаар бүтээгдэхүүнээ худалддаг юм билээ. Бид ч энэ аргыг судалж, хувийн хэвшилтэй шударгаар өрсөлдөнө. Төрийн нударга байх ёсгүй.

Манай компанийн өмнөх эзэд 37 тэрбум төгрөгийн найдваргүй авлага үүсгэж, толгой компани руугаа 117 тэрбум төгрөг шилжүүлжээ. Нийт 415 тэрбум төгрөгийн борлуулалт хийсэн байна. Бид хүчин чадлаа нэмбэл үнээ дахин бууруулах боломжтой.” гэв.      

Тэрээр ажлаа хүлээн авсны дараа АТГ-тай хамтран ажиллаж, Худалдаа Хөгжлийн банк тус компанийн данснаас хууль бусаар татсан 4.3 тэрбум төгрөгийг буцаан авчээ.

Энэ эх үүсвэрээр Хувь хүний орлогын албан татварын 1.3 тэрбум төгрөгийн хуримтлагдсан өрийг Сэлэнгэ аймгийн татварын албанд төлжсөн байна. Мөн аймгийн Нийгмийн даатгалын хэлтэст НДШ өр болох нэг тэрбум төгрөгийг төлжээ.

Өр барагдуулснаар үйлдвэрийн 800 орчим ажилчин тэтгэврээ тогтоолгох, жирэмсний, үйлдвэрлэлийн ослын, мэргэжлээс шалтгаалах өвчин, жирэмсэн, амаржсаны тэтгэмж авах, эмнэлэг, эмийн сангаар хөнгөлөлттэй үйлчлүүлэх зэрэг төрөөс иргэнд үзүүлэх нийгмийн даатгалын бүх төрлийн үйлчилгээг авч эхэлсэн байна.

Мөн компанийн битүүмжилсэн дансыг нээжээ.

Тус компанийн хуулийн баг компанийн дансаар гүйлгэсэн, ХХБ, Улаанбаатар хотын банкны зээлийн 55 тэрбум төгрөгийн хэргийг АТГ, шүүхэд баримтаар гаргаж, шалгуулах гомдол өгсөн юм. 2015 оноос буюу хувьчлагдсанаас хойш “Хөтөл цемент шохой” нийт 115 тэрбум төгрөгийн санхүүжилтийн  зардал төлжээ.