Жингээ барьж буй болон спорт, фитнесээр хичээллэж байгаа хүмүүсийн хувьд богино хугацаанд хурдан үр дүнд хүрэхийн тулд гурилан бүтээгдэхүүнийг нэн түрүүнд хасдаг. Гэвч аливаа хүнсний бүтээгдэхүүнийг хэрэглээнээс хасахын өмнө тухайн хүний хоногт авч байгаа нийт илчлэгийн хэмжээ болон зарцуулж буй илчлэгийн хэмжээний зөрүүг анхаарах хэрэгтэй. Гурил, гурилан бүтээгдэхүүн илчлэг ихтэй гээд шууд хасах нь илчлэгийн дутагдалд орох, ядрах, идэвхгүй болох гэх мэт сөрөг нөлөөтэй. Харин хооллолтод хүнсний бүтээгдэхүүний нэр төрлөө нэмэгдүүлэн, идэж буй хэмжээ, шим тэжээл, ашигт чанарыг анхаарах нь чухал юм. Гурил, гурилын хэрэглээг шууд хасах биш эслэгийн агууламж өндөр, цадах мэдрэмж өгөх, удаан шимэгдэж, биеийг урт хугацаанд илчлэгээр хангаж чадах зохистой бүтээгдэхүүнийг хэрэглэх нь чухал юм. Жишээлбэл: Арвайн гурил, Овьёос, Бүхэл үрийн гурил болон түүгээр хийсэн бүтээгдэхүүн (Давс, чихрийн агууламж багатай) гэх мэт. Мөн хүнсний ногооны бүлэг нь илчлэгийн хэмжээ хамгийн бага, эслэгийн хэмжээ өндөр тул хоногт идэх хэмжээ их, цадах мэдрэмж өгдөг.

Эдгээрээс бүхэл үрийн гурил нь ходоод гэдэсний үйл ажиллагааг сайжруулж, цусан дахь чихрийн хэмжээг багасган, зүрх судасны өвчнөөс урьдчилан сэргийлж биеийн эсэргүүцлийг сайжруулна. Мөн хүний биед хуримтлагдсан хортой бодисуудыг өөртөө шингээж гадагшлуулан, хэт таргалалтаас сэргийлэн, хорт хавдар болон үрэвслээс сэргийлнэ. Энэхүү эрүүл мэндийн ач холбогдол нь түүнд агуулагдаж байгаа эслэгийн агууламжтай холбоотой. Эслэг нь нэг төрлийн нийлмэл нүүрс ус бөгөөд жимс, жимсгэнэ, хүнсний ногоо, боловсруулаагүй үр тариа зэрэг ургамлын гаралтай хүнсэнд их хэмжээгээр агуулагддаг. Биед боловсрогдохгүй бөгөөд хэмжээгээ нэмэн, хөөдөг тул цадах мэдрэмж төрүүлэх, биед байгаа хорт нэгдлийг өөртөө нэгтгэн биеэс гадагшлах, өтгөн хаталт, бүдүүн гэдэсний хавдраас сэргийлэх, өтгөн хаталтыг эмчлэх зэрэгт хэрэглэдэг. Мөн эслэг нь бүдүүн гэдсэнд амьдардаг ашигтай бичил биетний тусламжтайгаар задардаг буюу тэдгээрийг хоол болдог тул ашигтай бичил биетний хэмжээг нэмнэ[1].

Насанд хүрсэн хүн хоногт 25-30гр, 1-3 насны хүүхдүүд 14гр эслэгийг хэрэглэхийг зөвлөдөг.

Манай улсын зах зээл дээр худалдаалагдаж байгаа гурил, гурилан бүтээгдэхүүнд агуулагдаж буй эслэгийн хэмжээ нь 100 гр тутамдаа бүхэл үрийн гурил 10 гр, овьёос 6 гр, хөх тарианы талх 7.9 гр, бүхэл үрийн талх 8.7 гр тус тус агуулагдаж байна[2]. Мөн бусад ургамлын гаралтай хүнсэнд эслэг агуулдаг тул аль болох олон хүнсний бүтээгдэхүүнээс эслэгийг авч болно.  Энэ үүднээс биологийн идэвхт бодис их хэмжээгээр агуулсан буудайн бүхэл үрийн гурилаар шимт чанартай, эмчилгээ сувиллын ач холбогдол бүхий талх, гурилан бүтээгдэхүүнийг  үйлдвэрлэлд нэвтрүүлэх нь хүн амын эрүүл мэндийг дэмжинэ^[3]. Бүхэл үрийн гурил нь бусад буудайн гурилаас эслэгийн агууламжаар ялгаатай, эрдэс бодис, В-ийн төрлийн аминдэмийн агууламжаар өндөр байна.

Илүү дэлгэрэнгүй мэдээллийг Улаанбаатар гурил пэйжээс /https://www.facebook.com/ulaanbaatarflour/?ref=pages_you_manage/  аваарай.