Шударга өрсөлдөөн, хэрэглэгчийн төлөө газрын дарга С.Мөнхчулуун Нэгдсэн үндэсний байгууллагын Хүүхдийн сан /UNICEF/-ийн Зүүн Ази, Номхон Далайн бүсийн зөвлөх Фиона Ватсон болон албаны төлөөллийг өнөөдөр хүлээн авч уулзлаа.

Уулзалтаар хүүхдийн эрүүл бус хооллолтын дадал бий болох суурь шалтгаан болдог хүүхэд рүү чиглэсэн хүнсний бүтээгдэхүүний зар сурталчилгаа, хүүхдийн таргалалтын талаар ярилцав.

Сахарын хэмжээ болон хүчил ихтэй, химийн болон удаан хадгалагч бодис орсон бүтээгдэхүүн хүүхдийн эрүүл мэндэд сөрөг нөлөөтэй. Хийжүүлсэн ундаа, шарсан төмс, резинэн чихрийг эцэг эхчүүд хүүхдүүддээ өгөх нь элбэг. Хүүхдэд чиглэсэн энэ төрлийн хүнсний бүтээгдэхүүний зар сурталчилгаа хяналт, зохицуулалтгүй явж ирсэн. Үүнийг өөрчлөх, хууль тогтоомжид тусгаж өгөх шаардлага байгаа юм.

НҮБ-ын Хүүхдийн сангийн дэмжлэгтэйгээр Зар сурталчилгааны тухай хуулийн үзэл баримтлал, хуулийн төслийн шинэчилсэн найруулгын төсөл боловсруулж байна. ШӨХТГ-ын дарга С.Мөнхчулуун “Хүүхдүүдийн хоол хүнсний сонголт, хооллох хэв маягт нөлөөлөх олон хүчин зүйл бий. Хүүхдийн хооллолт, эрүүл зан үйлийг төлөвшүүлэхэд зар сурталчилгаа чухал. Тиймээс хуулийн төсөлд эрүүл бус хүнсний бүтээгдэхүүний сурталчилгааг хязгаарлахаар тусгах, хэрэглэгчийн боловсролыг дээшлүүлэх чиглэлээр хамтран ажиллах саналтай байна” гэлээ.

Уг хуулийн төсөлд хүүхдийн эрүүл бус хооллолтын нөхцөл болдог сурталчилгааг хязгаарлах чиглэлээр тодорхой заалт тусгах нь зүйтэй гэдэгт хоёр тал санал нэгдсэн. Мөн хүүхдүүдэд эрүүл зөв хооллолт, хоол хүнсээ зөв сонгох, бүтээгдэхүүний орц найрлагыг уншиж сурах зэрэг мэдлэг мэдээлэл олгоход хамтран ажиллахаар боллоо гэж ШӨХТГ-аас мэдээлэв.