Монголын Буудлага спортын тамирчдаас “Токио 2020” Олимпын наадмын анхны эрхийг эмэгтэй гар бууны төрлийн тамирчин СМ Ц.Анударь авсан билээ. Харин хоёр дахь эрхийн эзэн нь эрэгтэй гар бууны 10 метрийн дасгалд цэц сорьсон, олон улсын хэмжээний мастер Энхтайваны Даваахүү байлаа.

Тэрээр урд хөршийн нийслэл Бээжин хотноо зохиогдсон Дэлхийн цомын цуврал тэмцээнд хийн гар бууны эрэгтэйчүүдийн 10 метрийн дасгалд 177.9 оноогоор тавдугаар байрт шалгарч Олимпын наадамд оролцох эрхтэй болов.

Тэрээр олимпын эрх хүртсэн талаараа “Надад итгэж, тусалж дэмжиж байсан бүх хүмүүст баярлалаа. Одоо дараагийн даваа Токиогийн тэнгэрт төрийн дууллаа эгшиглүүлэхийн тулд өөрт байгаа бүх хүчээ дайчлах болно. Токиогийн тэнгэрт Монголын далбаа олон мандах болтугай” хэмээжээ. 

Т.Түмэндэмбэрэл