-Танин мэдэхүй-

Өнөө үед хүн төрөлхтнийг хамгийн их түгшээж буй асуудлын нэг нь эрүүл мэнд юм. Цаг хугацаа өнгөрөх тусам шинэ нээлт, бүтээлүүд хүний хэрэглээнд түрэн орж буй ч бид тэр бүхний тухай мэдээлэл муутай байдаг нь үнэн. Үүнээс болж эрүүл мэндээрээ хохирч үлдэх тохиолдол олонтаа. Иймээс энэ дугаартаа гар утасны хорт нөлөөний тухай танилцуулъя.

Ажиллаж буй буюу асаалттай гар утсыг бага насны хүүхдэд бариулах нь хорт хавдар болон тархины хавдраар өвчлөх эрсдэлийг нэмэгдүүлдэг байна. Учир нь, гар утас эргэн тойрондоо байнга хорт туяа цацдаг аж. Судалгаагаар эл цацраг нь яс болон мэдрэлийн эрхтэн рүү хэдэн см-ийн гүнд нэвтэрч улмаар тархи, мэдрэлийн системд шингэдэг болохыг эрдэмтэд тогтоожээ.

Түүнчлэн зургаан минутаас удаан хугацаанд гар утсаар ярих нь чих, тархины даралтын хэвийн хэмийг нэмэгдүүлж улмаар толгой өвдөхөд хүргэдэг аж. АНУ-ын хүүхдийн эмчийн академийн мэргэжилтнүүд нялх хүүхдийн мэдрэлийн эрхтэн илүү нимгэн сийрэг байдгаас гар утасны хорт долгионд хамгийн их хорддог болохыг тайлбарлаж байна. Хүний тархи 20 нас хүртлээ өсч бойждог. Бойжилтийн энэ л үед хорт туяанаас хол байлгах ёстой. Хөгжлийг сааруулах тохиолдолд тархи хэвийн үйл ажиллагаагаа алддаг байх нь. Шведийн эрдэмтэд 20 наснаас өмнө гар утас хэрэглэсэн хүмүүсийн дунд судалгаа хийхэд тэдний тархины даралт болон сонсголын системд гажиг үүсгэдэг хорт хавдар бусад хүнийхээс дөрөв дахин өндөр байсныг тодорхойлжээ.

Ер нь 12 нас гар утас хэрэглэж болох хамгийн доод хэмжээ гэнэ. Энэ насны хүүхдүүд шаардлагатай үед гар утсыг захиа илгээх мэтээр хэрэглэж болох аж.

Б.Болортуул