Даяарчлалтай холбоотой гадаад хэл сурах шаардлага их гарч байна. Гадаад хүнтэй ярилцах гэхээр сэтгэлийн "хүлээс" саад болохоос эхлэн үгийн баялаг дутагдах зэргээр бидэнд бишгүй их саад тохиолддог. Харин үүнийгээ хэрхэн даван туулж болох вэ?

Уламжлалт аргаараа цээжилбэл өдөрт цөөхөн үг цээжилнэ. Яагаад гэвэл механик аргын үр дүн
маш бага. Харин утгачилсан, дүрслэх, төсөөлөх чадвар дээр тулгуурласан аргууд нь механик тогтоолтоос 20 дахин илүү үр дүнтэй гэдгийг сэтгэл судлаачид тогтоожээ.

Өөрөөр хэлбэл та нэг цагт 50 үг цээжлэх боломжтой. Итгэмээргүй сонстож байгаа ч Болгарын эрдэмтдийн тогтоосноор дундаж хүн 1 цагт 100 гадаад үг цээжлэх чадвартай байдаг байна. Ингэж чадна гэдэгт итгэж чадахгүй байгаа хүмүүс уламжлалт сэтгэлгээгээрээ сэтгэдэг. Тэгвэл асуудлыг өөр өнцгөөс хараад үз.

Итгэхийн тулд гагцхүү өөрсдөө хийгээд үзэх хэрэгтэй. 1 цагт 50 гадаад үг цээжлэхийн тулд 1 үгийг 72 секундэд цээжлэх шаардлагатай. Яг цээжлээд үзэхэд 72 секунд гэдэг бол маш их хугацаа юм. Нэг цагт 50 гадаад үг цээжлэх боломж олгож байгаа аргын үндэс нь ой тогтоолтын аргууд. Нөгөө л холбох, хувиргах, бэлгэдэн хувиргах арга гэх мэт.

Ихэнх хүмүүс гадаад үг цээжилж байхдаа тэр үгийнхээ гадаад дуудлагыг нь цээжилдэг. Мөн Монголоороо бас давтдаг. Ингэснээр хоёр үйлдэл хийж байна гэсэн үг. Тэгвэл ямар ч хэлэнд ямар ч үгийн утга нэг л байдгийг бүгд мэднэ.

Жишээлбэл, Монголоор "үзэг" гэдэг үгийг оросоор "ручка", англиар "pen" гэдэг. Гэтэл энэ бүх үгний цаана "үзэг" гэсэн нэг л объект байгаа. Тэгэхээр энэ объектыг хэн ч гэсэн санан төсөөлж чадна. Тийм учраас энэ үгийг Монголоороо хэлэх шаардлагагүй зүгээр төсөөлөхөд л хангалттай. Харин дээрээс нь дуудлагыг нь хувиргаж бодитой зүйл болгон төсөөлж байгаа дүрсэн дээрээ холбож өгөн цээжилнэ.

"Pen" гэдэг үгтэй дуудлага нь төстэй Монгол үг олох бага зэргийн бэрхшээлтэй асуудал. Гэхдээ ингээд сурчихвал амархан бөгөөд маш зугаатай байх болно. "Pen" гэдэг үгтэй дуудлага нь төстэй "пин" гэдэг үг яагаад байж болохгүй гэж. Одоо утга, дуудлага хоёрыг нь холбохын тулд "үзгээр пинг хатгаж байгаа"-гаар төсөөлж болно. Ингэхдээ хатгах үеийн бүх мэдрэмжүүдийг мэдрэхийг хичээх хэрэгтэй. Өөрөөр хэлбэл, харж /өөрсдөө "хатгавал" бүр илүү үр дүнтэй/, гарах дууг нь сонсож, үзгэнд "пингийн" хананы үзүүлж байгаа эсэргүүцлийг мэдрэнэ.

Ингээд эргэж санахад маш амархан санагдана. Эрдэмтдийн судалгаагаар 2000 үгийг тогтоочихвол уншсан сэдвийнхээ 60 хувийг ойлгох чадвартай болно. Харин 5000 үг цээжилчихвэл 85-90 хувийг ойлгож чадна. Цээжлэх үгийн тоо өсөх тусам ойлгох хувийн өсөлт буурна. Тийм учраас гуравхан хувиар ойлголтоо дээшлүүлэхийн тулд дахиад 5000 үг цээжлэх хэрэгтэй болно. Тэгэхээр 5000 үгтэй байхад л эхэн үедээ хангалттай. Яваандаа уг хэлээ идэвхтэй хэрэглэхийн хэрээр үгийн сан аяндаа нэмэгдээд ирдэг.