Эрчим хүчний яамны Төрийн нарийн бичгийн дарга Н.Тавинбэхээр ахлуулсан ажлын хэсэг Увс аймагт ажиллажээ. Тэд Улаангом хот дахь “Баруун бүсийн эрчим хүчний систем” ТӨХК, “Улаангомын дулааны станц-2” ТӨХК-ийн өвөлжилтийн бэлтгэл ажилтай танилцсан байна.

“Баруун бүсийн эрчим хүчний систем” ТӨХК-д Мянгадын 10 МВт-ын нарны станц ашиглалтад орсонтой холбогдуулан импортын эрчим хүчний хэмжээ буурчээ. Гэвч цахилгаан эрчим хүчний хэрэглээ эрчимтэй өссөн гэжээ. Цахилгаан эрчим хүчний үнэ өртгөөсөө 147.7 төг/кВт.ц-аар доогуур байгаа тул ОХУ-аас импортолж буй цахилгааны валютын ханшны алдагдал нэмэгджээ.

Энэ оны хагас жилийн байдлаар  5.1 тэрбум төгрөгийн импортын эрчим хүчний өглөгтэй, 1.9 тэрбум төгрөгийн татварын өглөгтэй ажиллаж, санхүүгийн нөхцөл хүндэрсэн байна. “Баруун бүсийн эрчим хүчний систем” ТӨХК-ийн өвөлжилтийн бэлтгэл 75 хувьтай байна. Төлөвлөсөн хөрөнгө оруулалт, их засвар, ТЗБАХ-г хугацаанд дуусгахаар ажиллаж байгааг ажлын хэсэгт танилцуулжээ.

Тус компани ирэх өвлийн их ачааллыг давахад тулгамдаж буй асуудлуудаа Эрчим хүчний яаманд уламжилж, дэмжлэг үзүүлэхийг хүссэн байна. “Улаангомын дулааны станц-2” ТӨХК-ийн өвөлжилтийн бэлтгэл 50 хувьтай,  төлөвлөгөөний дагуу үргэлжилж байна. Нүүрсний нэг сарын нөөцтэй байгаа аж.

Увс аймгийн Улаангом хотын дулааны эрчим хүчний хэрэглээ нэмэгдэж, сүүлийн жилүүдэд станц бүрэн ачаалж, нөөц тоноглолгүй ажиллажээ. Иймд өвлийн оргил ачааллын үеэр эрсдэлтэй нөхцөл үүсэж байгаа тул станцын өргөтгөлийг ирэх оны улсын төсөвт тусгуулах шаардлагатай гэв.