Нийслэлийн замын хөдөлгөөний түгжрэл, ачааллыг бууруулах зорилгоор зарим авто замд өглөө, оройн оргил цагаар зорчих хөдөлгөөнд өөрчлөлт оруулсан талаар Тээврийн цагдаагийн албанаас мэдээлж байна.

Тээврийн цагдаагийн албаны дарга хурандаа Б.Оюутболд "Цагдаагийн байгууллага хуулиар хүлээсэн үүргийнхээ хүрээнд өөрчлөлт хийж байна. 17:50 цагт Чингисийн өргөн чөлөөнд хийсэн өөрчлөлтийн үр дүнд 18:40 цагийн үед энгийн үеэс эрс ачаалал багассан. 30 минутаар сунгаж үзэхэд уулын зам, Зайсангийн замд хөдөлгөөний ачаалал нэмэгдсэн тул хөдөлгөөнийг 19:30 хэвийн горимд шилжүүлж, 20:45 цагт хөдөлгөөн бүрэн хэвийн болж өчигдөр /03.12/ 21:40 цаг гэхэд хөдөлгөөний ачаалал байхгүй болсон.

13-н буюу өнөөдөр 07:00-07:30 цагт эсрэг хөдөлгөөнийг нэмэгдүүлэхэд 08:26 цагт гэхэд хамгийн ачаалал ихтэй байдаг Чингисийн өргөн чөлөө, Олимпын гудамжид ямар нэгэн ачаалал байгаагүй ба энэ хугацаанд замын хөдөлгөөний удирдлагын төвөөс бусад хөдөлгөөнийг тэнцвэржүүлэх чиглэлд тасралтгүй арга хэмжээ авч ажиллаж байсан. Ялангуяа өнөө өглөө өмнө нь байгаагүйгээр буюу энгийн үеэс илүү ачаалал буурсан.

Бид ачааллын өөрчлөлтийн дүр зургийг шинжилж, зураг авалт хийн харьцуулах тул заавал урьдчилж мэдэгдэх шаардлагагүй гэж үзсэн

Мөн яаралтай явж байгаа гэх шалтгаанаар жолооч нар эсрэг урсгал сөрж зам тээврийн осол гарах эрсдэлийг нэмж байна. Тодруулбал хоёр урсгал сөрсөн, нийтийн тээврийн урдуур орж мөргөлдсөн гээд гурван удаагийн зам тээврийн осол гарсан. Чингисийн өргөн чөлөө болон Олимпын гудамжид зураг авалтыг тогтмол хийж, харьцуулалт хийж байгаа ба үр дүн нь маргааш гарна. Маш богино хугацаанд ачааллыг давчихад замын хөдөлгөөний эрчим нэмэгдэж, ачаалал сийрэгжинэ гэж харж байна. Хэрэв үр дүнтэй байвал цаашид тогтмолжуулна.

Бид ачааллын өөрчлөлтийн дүр зургийг шинжилж, зураг авалт хийн харьцуулах тул заавал урьдчилж мэдэгдэх шаардлагагүй гэж үзэн, харин жолооч, иргэдийн төөрөгдүүлэхээс сэргийлж цаг тухайд нь өөрчлөлтийн мэдээллийг хүргэсэн" гэлээ.