Мобиком Корпораци нь орон нутагт ажлын байр нэмэгдүүлэх зорилгоор Дархан хот дахь Үйлчилгээний нэгдсэн төвөө өргөжүүлж, 60 гаруй ажлын байр бий болголоо.

Мобиком анх 2 жилийн өмнө Үйлчилгээний нэгдсэн төв - 2222-ынхоо орон нутаг дахь анхны салбарыг Дархан хотод нээж, Улаанбаатар хоттой ижил цалин, урамшууллын нөхцөлтэй, тав тухтай ажлын байраар Дарханчуудыг хангаж байсан юм.

Тэгвэл өргөтгөл хийснээр ажлын байр нэмэгдээд зогсохгүй ҮНТ-д анх байгуулагдсан цагаас хойш ажиллаж буй ажилтнуудад карьераа өсгөх таатай боломж бүрджээ.

Мобиком Корпораци ХХК-ийн Гүйцэтгэх захирал Кожи Курушима:

Дарханд ҮНТ-өө нээснээс хойш Дарханы залуучууд хөдөлмөрч, зарчимч, ур чадвар сайтай гэдэг нь харагдаж байсан. Тиймээс дараа дараагийн боломжуудыг судалж үзсэний дүнд энэхүү төвөө өргөжүүлж байна. Бид хэрэглэгчдэдээ найдвартай, чанартай үйлчилгээг үзүүлэхээс гадна Монгол орныхоо эдийн засагт хувь нэмэр оруулахыг зорьдог. Тиймээс энэхүү ҮНТ-өөрөө дамжуулан, орон нутгийн хөгжилд дэмжлэг үзүүлж буйдаа баяртай байна.

Дархан-Уул аймгийн ИТХ-ын дарга Насанбат:

2 жилийн өмнө Дархан 100 мянган хүнтэй байсан бол өнөөдөр 107 мянган хүнтэй болсон. Дарханд шилжин суурьшихаар ирж буй хүмүүс ажлын байр, орон сууц, төрийн үйлчилгээний хүртээмж, чанарыг их асууж байна. Дархан хот төвийн бүсийн тулгуур болж, хөгжлийн бодлогоор түүчээлж буй энэ үед Мобикомын хийж буй хөрөнгө оруулалт цаг үеэ олсон зөв хөрөнгө оруулалт болж байна. Мобикомын хамт олонд нийт Дарханчуудынхаа өмнөөс талархал илэрхийлье.

Дархан-Уул аймгийн Засаг даргын орлогч Б.Жавхлан

Дархан-Уул аймаг МУ-ын Засгийн газрын Шинэ сэргэлтийн бодлогын хүрээнд шилжилт хөдөлгөөнийг хүлээн авах хамгийн өндөр боломжтой аймгаар тодорсон. Өөрөөр хэлбэл, манай аймгийн орчин нөхцөл шилжин ирэгсэд болон бизнес эрхлэх гэж байгаа хүмүүсийн сонирхлыг татаж байна. Мобиком Дарханд ҮНТ-өө нээсний дараа бусад операторууд ч дуудлагын төвөө нээсэн. Зөвхөн үүрэн холбоо ч гэлтгүй Дарханд салбар, нэгж, компани байгуулсан тоо статистик судалгаагаар Монголдоо хамгийн их байна. Хувийн хэвшлүүд орон нутаг руу ийнхүү хөрөнгө оруулж байгаа нь ажлын байр бий болох, цаашлаад эдийн засаг, нийгмийн тэлэлт явагдах зэргээр чухал ач холбогдолтой юм.   

Дарханы ҮНТ-ийн Хэрэглэгчийн зөвлөх О.Уянга

Манайх 3 хүүхэдтэй залуу гэр бүл. Анх 3 жилийн өмнө Улаанбаатар хотоос Дархан руу нүүж ирсэн. 2 жилийн өмнө Мобикомдоо ажилд орсноор сайхан хамт олонтой болж, байгууллага, гэр бүл, нийгэмдээ оролцоотой болж, өөртөө итгэх итгэлтэй, сэтгэл хангалуун амьдардаг болсон. Эндээ тогтвортой ажлын байртай болсноор Улаанбаатар руу буцахгүйгээр Дархандаа суурьшин амьдрах шийдвэрийг гаргасан. Манай ажил над шиг жаахан хүүхдүүдтэй, эсвэл оюутан залуус ажиллахад таатай ажлын уян хатан цагтай байдаг. Тиймээс гэр бүлдээ зарцуулах, эсвэл сурч хөгжих цагийг хангалттай гаргаж чаддаг. Энэ 2 жилийн хугацаанд Үйлчилгээний зөвлөхөөр ажилласан бол өргөтгөл хийгдсэнээр Хэрэглэгчийн зөвлөх болж албан тушаал ахисан. Надтай адилхан албан тушаал ахисан олон ажилтан байгаа. Биднийг Дархандаа тогтвор суурьшилтай ажиллах боломжийг нээж өгсөн компанидаа баярлалаа.

Мобиком Корпораци 10-р сараас Улаанбаатар хот дахь Үйлчилгээний нэгдсэн төвдөө тэтгэвэрт гарсан ажилтнуудыг ажиллуулж эхэлсэн. Тэгвэл орон нутагт ч тэгш, хүртээмжтэй ажлын байр бий болгох зорилгоор ирэх оноос Дарханы ҮНТ-дөө тэтгэвэрт гарсан хүмүүсийг ажлын байранд урихаар төлөвлөж байна.