11 нас хүрч байгаа "Люмино" хамтлагийнхан ойн баяраа "Best of Lumino" тоглолтоороо тэмдэглэхээр зэхэж байсан билээ. Энэ сарын 23, 24-нд товлосон уг тоглолтдоо тэд өнгөрсөн хугацаанд хийсэн бүх уран бүтээлээ тайлагнахаар шийдсэн ч хойшлуулахаас өөр аргагүй болжээ.

Нийслэлд гахайн ханиадны H1N1 вирус гарсан учраас "Люмино" хамтлагийнхан тоглолтоо ирэх сарын 6, 7-нд хийхээр болсон гэнэ. Томоохон хэмжээний тоглолт хийх санаатай яваа авъяаслаг залуус энэ хугацаанд бэлтгэл ажил, найруулга дээрээ анхаарч ажиллахаар ярилцаж байгаа аж.

Уран бүтээлээ завсарласан гурван жилийн хугацаанд тэд зүгээр суугаагүй гэдгээ ч илэрхийлээд амжсан шүү. Тус тусынхаа уран бүтээлд анхаарч, бие даасан цомог гаргахаар зэхэж байснаа дуулгана билээ. Хамтлагийн ахлагч MC болон дуучин Baji нар шинэ цомгоо гаргахаар ажиллаж байгаа бол, Анхаа хоёр дахь цомгийнхоо ажилд орсон сурагтай. Хамтлагийнхан энэхүү тоглолтоороо "Люмино"-гийн хуучин түүх өндөрлөж, шинэ түүх эхлэж байгааг мэдрүүлэх гэнэ.