2009 он улирч буйтай холбогдон дэлхийн хамгийн хамгийн гэсэн тодотголтой жагсаалтууд ээлж дараалан гарч байгаа билээ. Уншигчдын амралт чөлөөт цагт зориулан энэ удаагийн дугаартаа дэлхийн хамгийн том есөн амьтныг танилцуулж байна.

1. Дэлхийн хамгийн том нохой

Гиннесийн дээд амжилтын номонд бүртгэгдсэн дэлхийн хамгийн том нохойг Геркулес гэдэг. Английн мастифф үүлдрийн энэ нохойн хүзүүний тойрог 96 см, биеийн жин 128 кг гэнэ. Гурван настай гэхэд ижил үүлдрийн нохдоос хавьгүй том биетэй аж. “Би Геркулесийг жирийн нохойн адил л хооллодог ч тэр улам л томроод байдаг” гэж аварга нохойн эзэн Флин хэлжээ.

2. Дэлхийн хамгийн өндөр морь

Бельгийн хөллөгөөний үүлдрийн Радар гэдэг энэ морь дэлхийн хамгийн өндөр морь юм. 1998 онд АНУ-ын Айово муж улсад төрсөн энэ морь 2006 оноос хойш өдийг хүртэл дэлхийн хамгийн өндөр морь гэсэн цолыг эзэмшиж байгаа билээ. Аварга морь 1,86 метр өндөр бөгөөд өдөрт 20 галлон ус /1 галлон = 3-4 литр/, 8,1 кг өвс хэрэглэдэг байна.

3. Дэлхийн хамгийн том үхэр

Дэлхийн хамгийн том үхэр бараг л жижиг заантай адил жинтэй аж. Чили гэдэг аварга үхэр 1,89 метр өндөр, тонн гаруй жинтэй гэнэ. Чили зөвхөн бэлчээрийн өвсөө идэхээс биш, тусгай тэжээл хэрэглэдэггүй байна.

4. Дэлхийн хамгийн том гахай

Хятадын Ляонин мужийн хөдөө аж ахуйн музей 900 кг жинтэй гахайгаа Гиннесийн амжилт бүртгэх газарт дэлхийн хамгийн том амьтанд бүртгүүлэх хүсэлт гаргажээ. Энэ гахай нь өнгөрсөн хоёрдугаар сарын 5-нд үхсэн байна. Уг гахай 2,5 метр урт бөгөөд бүсэлхийн тойрог нь 2,23 метр, соёо нь 14,4 см аж. Гахайн эзний хэлснээр энэ амьтан таван настай байжээ.

5. Дэлхийн хамгийн том судалт шүдэрхэг загас

Меконг мөрний аварга том судалт шүдэрхэг загас цэнгэг усны хамгийн том загас аж. 2,7 метр урт уг загасны биеийн жин баавгайнхтай адил гэнэ. Энэ 110 кг жинтэй аварга загасыг 2005 онд орон нутгийн загасчид Таиландын хойд нутгаас барьжээ.

6. Дэлхийн хамгийн өндөр нохой

Дэлхийн хамгийн өндөр нохойгоор Гибсон гэдэг харлекуин грит дин үүлдрийн нохой бүртгэгджээ. 2,7 метр өндөр Гибсон Америкийн үндэсний сагсан бөмбөгийн холбооны тоглогчдоос ч өндөр юм. Хамгийн өндөр нохойн биеийн жин 77 кг аж.

7. Дэлхийн хамгийн том муур

АНУ-ын Майами хотын Жунгле арал бол лигерийн /эр арслан, эм барын дундаас төрсөн эрлийз/ төрсөн гэр юм. Гиннесийн дээд амжилтын номонд манай гарагийн хамгийн том муураар лигерийг нэрлэсэн юм. Жунгле арлын Геркулес гэдэг лигер нь 408 кг гаруй жинтэй аж.

8. Дэлхийн хамгийн том далайн муур

Далайн аварга том энэ амьтныг газар гаргахад 13 эр нэг цаг 30 гаруй минут ноцолдсон байна. Дэлхийн хамгийн том далайн муур 2,7 метр урт байжээ. Уг амьтныг дэгээдсэн Ян Вельч түүнийг уснаас гарган авах гэж багагүй сандарч байжээ.

9. Дэлхийн хамгийн том махчин халим загас

Дэлхийн хамгийн том махчин халим загасыг Хятадын тэнгисийн эргээс барьсан байна. Уг загас нь 18 метр урт, найман тонн жинтэй байжээ.

С.Отгонбаяр