“Айвенхоу Майнз Монголия Инк” ХХК-ийн төлөөлөгчид манай улсад ирж Оюутолгой орд газрыг ашиглах хөрөнгө оруулалтын гэрээний төслийг боловсруулсан ажлын хэсэгтэй уулзаж, шинээр үүссэн нөхцөл байдлын хүрээнд  хэлэлцээгээ үргэлжүүлж байна. Энэ даваа гаригаас эхлэн явагдаж буй тус хэлэлцээ ямар уур амьсгалтай болж байгаа талаар Эрдэс баялаг, Эрчим хүчний сайд Д.Зоригтоос тодрууллаа.

-Хэлэлцээ ямар шатандаа явж байна вэ?
-Яриа, хэлэлцээ дөнгөж эхэлж байгаа болохоор одоохондоо мэдээлэл өгөхөд арай эрт байна. Шууд хэлэхэд, нөхцөл байдал амаргүй байна. УИХ татварын хөнгөлөлт үзүүлэхгүй дээрээс нь  34 хувиа ав гэсэн шаардлагыг тавиад байгаа.

Мөн УИХ-ын хаврын чуулган завсарлах өдрөө Нэмэгдсэн өртгийн албан татварын тухай хуульд өөрчлөлт оруулсан. Энэ нь уул, уурхайн бүтээгдэхүүний буцаан олголтыг зогсоосон явдал болсон. Эдгээр асуудлаас гадна 30 гаруй асуудал дээр бид ярилцаж байна.

Өчигдөр, уржигдар гээд хоёр өдөр хэлэлцээ хийсэн. Өнөөдөр мөн хэлэлцээ хийнэ.
Засгийн газар  УИХ-аас гаргасан тогтоолын дагуу гэрээ хийх бүх алхмыг хийж байгаа.

Тодорхой нарийн мэдээллийг өгөхөд  эрт байна.

-Хөрөнгө оруулагчдын зүгээс ямар санал тавьж байх юм?
-Байдал амаргүй байна. Яагаад гэвэл УИХ-аас гаргасан тогтоол асуудлыг бүр шинээр ярих шаардлагатай болгосон.

-Хөрөнгө оруулагчид 68 хувийн татварыг НӨАТ ашигласан төлбөрөөр дүйцүүлэх санал тавьж байгаа гэсэн. Энэ үнэн үү?
-Яриа хэлэлцээний үеэр яригдаж байгаа хамгийн том асуудлын нэг. Гэхдээ яг ийм, тийм хэлбэрээр шийдье гэж эцэслэгдээгүй байна.

Ийнхүү үүсээд буй шинэ нөхцөл байдлын хүрээнд хоёр тал хэлэлцээгээ үргэлжүүлж байна.  Харин хэн хэндээ ашигтай гэрээ болж чадах уу, үгүй юу гэдэг тодорхойгүй.

Ч.Болортуяа  /bolortuya.ch@gogo.mn/