Монголын утга зохиолын босоо цагаан давалгаа буюу 90-ээд оныхны шижигнэсэн залуу найрагчдын дунд тоос татуулан орж ирсэн Баярхүүгийн Ичинхорлоо хэмээх энэ найрагч хатагтай “Миний Монголын тэнгэрийг эсгэх гэж бусдын од харвадаггүй, Миний Монголын тэнгэрт эрхлэх гэж бусдын од шохоорхдог, Миний Монголын тэнгэрт өдөлсөн шувуу бусдын нутагт өдөө цацдаггүй, Миний Монголын тэнгэрт өссөн бүргэд будант газар ясаа тавьдаггүй” хэмээн цуурай татуулан омогшиж байсан цаг яах аргагүй Монгол найргийн алтан үе байв.

Утга зохиолын орчинд хувь заяаны дуудлагаар хөл тавьсан хэмээн сүсэглэдэг тэрээр хэдэн жилийн өмнө гэр бүлийн хамт холын Америкийг зорьж, хөх Монголоо хэсэг хугацаанд орхисон. Хүний нутгийн тэнгэр дор бачимдаж, давчдаж байна хэмээн голын үгээ хэлж байсан түүний нөхөр С.Товуудорж хэмээх эрхэм бий.

Баруун бүсийн эрчим хүчний системийн дарга хийж байсан ноён С.Товуудоржийг Монголын эрчим хүчний ирээдүй хэмээн удирдлагууд нь үзсэн учраас хөдөөний эгэл нэгэн залууд байр өгч, түүгээр барахгүй Америкт мастер хамгаалах боломжоор хангасан гээд найрагчийн нөхөр ёстой л бөндгөрөөрөө товойж гарч ирсэн нэгэн.

Өдгөө Түлш эрчим хүчний яамны Мониторингийн судалгааны албаны даргаар ажиллаж байгаа ноён С.Товуудоржийг ирээдүйд энэ салбарыг авч явах хүмүүсийн нэг хэмээдэг юм билээ. Хосууд 3 хүүтэй.