100 тонн давсан жинтэй, хүнд даацын машинууд говийн хөрсийг сүйтгэж, байгаль орчинд сөрөг нөлөө үзүүлж байгааг хэдэн жил шүүмжлэн ярьсан ч шийдэгдэлгүй өдийг хүрсэн.

“Энержи ресурс” компани Таван толгой-Гашуун сухайт чиглэлд өөрийн хөрөнгөөр хатуу хучилттай зам барьсныг өнгөрсөн жил улс худалдан авсан юм. Таван толгойн ордод үйл ажиллагаа явуулдаг компаниуд хураамж төлөөд энэ замаар нүүрсээ тээвэрлэх боломжтой. Гэвч замын хураамжийн ялгаатай тариф мөрдөж байгаа нь өрсөлдөөнд нөлөөлж байгааг холбогдох хүмүүс Шадар сайд У.Хүрэлсүхэд уламжилж, шийдвэрлэж өгөхийг хүссэн байна.

“Энержи ресурс” компани нэг тонн тутамд 0.75 цент, нөгөө хоёр компани 1.5 долларын хураамж төлдөг. Хураамж өндөр байгаагаас орон нутгийн Таван толгой, “Эрдэнэс таван толгой” компанийн нүүрс ачсан  машинууд хил хүртэл шороон замаар явж, тоос босгодог.

Энэ асуудлыг шийдэж, хураамжийг нэг доллар болгох, шороон замаар нүүрс тээвэрлэхийг хориглож, бүх автомашин засмал замаар тээвэрлэдэг болгох асуудлыг долоо хоногийн дотор шийдэхийг Зам тээврийн яамны Төрийн нарийн бичгийн дарга, МХЕГ-ын дарга, “Эрдэнэс монгол” ТӨХК-ийн удирлагууд, холбогдох хүмүүст өнгөрсөн сарын 30-нд үүрэг болгосон юм.

Харин өнөөдөр буюу үүрэг даалгаврын хугацаа дуусах сүүлийн өдөр төрийн өмчит “Эрдэнэс таван толгой”, орон нутгийн Тавантолгой болон Энержи Ресурс компаниуд санамж бичигт гарын үсэг зурна. Ингэснээр Монголд мөрдөж буй стандарт, журмын дагуу тусгай зориулалтын авто зам ашиглан тээвэрлэлт хийх, байгаль орчныг хамгаалах, хөдөлгөөний аюулгүй байдлыг хангах боломж бүрдэх юм байна.