Амралтын өдрүүдэд шатахуун түгээх станцуудад урт дараалал үүсэж, шатахууны хомсдол бий болсон билээ. Тэгвэл өнөөдөр /өчигдөр 2018.01.15-ны 14:00 цагийн байдлаар/ байдал ямар байгааг сурвалжлахаар хотын төв болон Баянхошуунд байрлах ШТС-уудыг зорилоо.

Хамгийн их эрэлттэй байдаг АИ92 шатахуун 1630, АИ95 1820 төгрөгийн үнэтэй байсан бөгөөд үнэ нэмэгдээгүй ч хотын төвийн ШТС-ууд дараалал үүссэн, харин хотын захаар зарим ШТС-ууд хаалгаа барьсан байлаа.

Энэ үеэр жолооч нараас шатахууны үнэ амралтын өдрүүдэд нэмэгдсэн байсан эсэх, шатахуун ховордож, худалдаж авахад хүндрэл үүссэн эсэхэд хариулт авлаа.

Жолооч А:

"Хагас сайнд /2018.01.13/ машины шар гэрэл асаад хороолол дахь гэрийнхээ ойролцоох МТ-гийн колонк ортол "тог тасарсан" гэсэн бичигтэй ажиллахгүй байсан. Тэгээд 10-р хорооллын МТ ортол нэлээн урт дараалал үүсчихсэн болохоор нь хэд хэдэн колонкоор дайрлаа. Зарим нь ажиллахгүй, зарим нь урт дараалалтай байсан. Тэгээд "Сод Монгол"-ын ШТС дээр очоод удаан хүлээгээд, миний ээлж иртэл зөвхөн "Сод Монгол"-ын картаар үйлчилнэ гэсэн. Юу юугүй машин унтарчих гээд шатахуун авах гэж сандарсан шүү. АИ92-ын үнэ өөрчлөгдөөгүй, 1630 төгрөгийн үнэтэй байсан" гэв.

Жолооч Э:

"Евро стандартын АИ92 1890 төгрөг болсон байснаас энгийн нь 1630 хэвээрээ байсан даа. Баасан гарагийн орой /2018.01.12/ Энх тайвны гүүрний доод талын "Петровис" ортол "засвартай" гээд ажиллахгүй байсан. Тэгээд "Говь"-ийн зам руу ороод зам дагуу байдаг "Шунхлай" ортол АИ92 байхгүй гэв. Цаашаагаа явж "Петровис"-т очиход энгийн АИ92 байхгүй, евро стандартын АИ92 1890 төгрөг болсон байсан. Гэхдээ л их урт дараалалтай байсан" гэлээ.

"ПЕТРОВИС"  АИ95 шатахууны үнийг 150 төгрөгөөр нэмжээ

Тасганы овооны дэргэдэх “Петровис”-ийн ШТС-д картаар болон бэлэн мөнгөөр ямар нэг хязгаарлалт тогтоогоогүй хэвийн түгээж байсан бөгөөд дараалал бага зэрэг нэмэгдсэн байлаа. Тус ШТС-ын АИ 92 шатахуун 1630 буюу өмнө нь байсан үнэ өөрчлөгдөөгүй бол АИ95 өнгөрсөн арванхоёрдугаар сарын үнээ 150 төгрөгөөр нэмсэн байна.

"Петровис"-ийн АИ95 шатахуун арванхоёрдугаар сард 1820 төгрөг байсан бол өнөөдрийн байдлаар 1970 төгрөгийн үнэтэй байна.

"СОД МОНГОЛ" зөвхөн өөрсдийн карттай жолоочдод үйлчилж байна

“Сод Монгол” ШТС зөвхөн өөрсдийн “Сод Монгол”-ын карттай жолооч нарт дээд тал нь 50 мянган төгрөгийн шатахуун худалдаалж байлаа. Телевизийн шинэ эцэс дэх “Сод Монгол”-ын ШТС-д АИ95-ын үнэ тавиагүй байсан бол Баянхошууны тойрогт зөвхөн ДТ80 түлш л түгээж байв.

СИНЧИ ОЙЛ-ын Баянбүрдийн салбарт урт дараалал үүсчээ

СИНЧИ ОЙЛ-ын Тасганы овооны зүүн талд байрладаг салбарт урт дараалал үүссэн бөгөөд тус ШТС АИ 92 шатахуунаа 1620 төгрөгөөр буюу бусад ШТС-уудаас 10 төгрөгөөр хямд, АИ95-ыг бусдын адил 1820 төгрөгөөр худалдаалж байв.

"ШУНХЛАЙ"-н хотын төвийнх хэвийн ажиллаж байна

Баянхошууны тойрогт АИ92, АИ95 шатахуун байхгүй гэсэн бол хотын төвүүдийнх хэвийн ажиллаж байгаа гэв.

"ТЭС ПЕТРОЛЕУМ"-ын хоёр ч салбар ажиллахгүй байв

“Тэс Петролеум”-ын Хөтөлийн колонк болон Хилчин хотхоны ШТС-ууд хаалттай буюу "засвартай" гэсэн бичиг хадсан байлаа. Шатахуун түгээгчээс хэд хоног ажиллахгүй байгааг асуухад "Мэдэхгүй. 21 дүгээр хорооллынх ажиллаж байгаа гэсэн" хэмээн хариулсан юм.

М-ОЙЛ: Одоогоор шатахуун байхгүй, гэхдээ хэвийн ажиллаж байна 

Хилчин хотхоны зүүн талд байрладаг М-Ойл-ын салбарын шатахуун түгээгч “Уг нь манайх хэвийн ажиллаж байгаа ч АИ 92, АИ95 алга байна. Одоо ирж байгаа” гэсэн юм.

ЖАСТ ОЙЛ хэвийн 

“Жаст Ойл”-ын МҮОНТ-ийн урд байрладаг салбарт шатахуун хэвийн түгээж байгаагаа хэллээ.

МТ шатахуун байхгүй гэв

МҮОНТ-ээс UBS телевиз рүү уруудах замд байрладаг MT-гийн түгээгч мөн л шатахуун байхгүй гэв.

ОХУ-Д ХУДАЛДААЛАГДАЖ БУЙ ШАТАХУУНЫ ҮНЭ ДУНДЖААР

/Эх сурвалж: http://www.benzin-cena.ru/

Улаанбаатар хотын зарим ШТС-уудад худалдаалж буй шатахууны үнэ 

Дараах фото сурвалжилгаас Улаанбаатар хотын зарим ШТС-уудын шатахууны үнийн нөхцөл байдалтай танилцана уу.

Гэрэл зургийг: Д.Жавхлантөгс