Ерөнхийлөгч Х.Баттулга УИХ-ын гишүүн асан Р.Бурмааг Үндсэн хуулийн цэцийн гишүүнээр томилуулах саналаа УИХ-д уламжилсан байна.

Цэцийн есөн гишүүнийг зургаан жил тутам шинээр томилдог бөгөөд Ерөнхийлөгч, УИХ, Улсын дээд шүүх тус бүр гурван хүнийг нэр дэвшүүлэх эрхтэй.

Харин томилох эрх нь УИХ-д бий. Одоогийн гишүүдээс Н.Жанцан, Д.Наранчимэг, Т.Лхагваа нарыг өмнөх Ерөнхийлөгчийн зүгээс санал болгож, томилсон бөгөөд тэдний бүрэн эрхийн хугацаа үндсэндээ дуусаж байгаа юм.

Тодруулбал, Н.Жанцан 1992 оноос хойш тасралтгүй дөрвөн удаа томилогдон ажиллаж буй бөгөөд өнгөрөгч хавар бүрэн эрхийн хугацаа нь дуусгавар болсон юм.

Мөн 2005 оноос хойш дараалан хоёр удаа томилогдон ажиллаж буй Д.Наранчимэг гишүүний бүрэн эрх өнгөрөгч тавдугаар сард дууссан билээ. Цаашлаад Т.Лхагваа гишүүний бүрэн эрх 2018 онд дуусахаар байгаа юм.

Цэцийн гишүүн Т.Лхагваагийн бүрэн эрх хараахан дуусаагүй байгаа бөгөөд Н.Жанцан, Д.Наранчимэг нарын хэн нэгнийх нь оронд Р.Бурмааг томилуулах хүсэлтэй буй бололтой.

Дашрамд дурдахад, хүчин төгөлдөр үйлчилж буй хуулийн хүрээнд Цэцийн гишүүнийг хэдэн ч удаа улируулан томилж, хэд ч хүртэл нь ажиллуулж болох юм. Р.Бурмаа нь МоАХ фракцынх гэгддэг билээ.  

Р.Бурмаа нь:

1958 онд Улаанбаатарт хотод төрсөн
1975 онд Нийслэлийн 52-р дунд сургууль
1982 онд БНБАУ-ын Электрон Техникийн их сургууль
1987 онд МУИС-ийн англи хэлний дээд курс
1992 онд Удирдлагын хөгжлийн институтыг төгссөн

Ажилласан байдал:

1982-1988 онд ШУА-ийн Физикийн хүрээлэнд эрдэм шинжилгээний ажилтан
1988-1992 “Монел” фирм
1988-1992 онд Монэл фирмд инженер, зохион бүтээгч
1992-1996 онд “Нийгмийн дэвшил” эмэгтэйчүүд хөдөлгөөний тэргүүн
1996-1997 онд Хүүхдийн төлөө төвийн дарга
1997-2002 Сонгогчдын боловсрол төвийн захирал
2002-2006 онд Сонгуулийн ерөнхий хорооны гишүүн
2005-2011 онд МҮОНРТ-ийн үндэсний зөвлөлийн гишүүн
2008-2012 онд Монгол улсын Ерөнхийлөгчийн орон тооны бус зөвлөх
2012-2016 онд УИХ-ын гишүүн
2012-2014 онд УИХ-ын Өргөдлийн байнгын хорооны дарга
2014-2016 онд Хүнс, хөдөө аж ахуйн сайд
2017 оноос АТГ-ын дэргэдэх Олон нийтийн зөвлөлийн гишүүнээр тус тус ажиллаж байна.