Хүүхэд ахуйдаа зураг будаж үзээгүй хүн гэж бараг үгүй биз. Янз бүрийн өнгийн харандаа эсвэл фламастер гартаа барьчихаад үлгэрийн баатрууд, эсвэл ан амьтан будаж суух нь үнэхээр сайхан.  

Гэтэл зүгээр нэг таашаал аваад зогсохгүй уур бухимдлаа тайлахад зураг будах нь чухал үүрэгтэй гэнэ. Сэтгэл судлаачдын үзэж буйгаар мэс засалд орсны дараа эмчилгээ хийлгэж байгаа, эсвэл таагүй үйл явдал сэтгэл түгшээсэн тохиолдолд зураг будах нь үнэхээр ач холбогдолтой бөгөөд энэ үйл явцад тухайн хүн хуримтлуулсан уур бухимдлаа мартдаг аж.

Зураг зурж чадахгүй ч гэлээ будсаны дараа өөрийн бүтээл хэмээн хардаг нь ч хүний сэтгэл санаанд ихээхэн таашаал авчирдаг зүйл юм байна. Зураач, архитектор, уран барималч байх албагүй, зүгээр л таалагдсан зургаа сонгож аваад зурах хэрэгтэй. Үүнийг хүн бүр л чадна. Нас бие гүйцсэн хүмүүс голдуу төрөл бүрийн хээ угалз, хэлбэр дүрс зэргийг сонгон авдаг аж.  

“Ийм төрлийн үйлдэл логик сэтгэлгээг сэргээж өгдөг. Учир нь хэлбэр дүрсийг бид тодорхой зарчмын дагуу буддаг. Ингэхдээ хөдөлгөөний чиглэлийг тодорхойлдог уураг тархины хэсэг идэвхтэй ажиллагаанд орно. Ийм ажил гүйцэтгэх зуурт тархины стресст байдлыг хариуцдаг бүйлсэн биет суларч эхэлдэг юм” хэмээн сэтгэл судлаач Глория Мартинес Айала Испанийн “Huffington Post” сонинд өгсөн ярилцлагадаа онцолжээ.

Зураг будаад сууж буй хүн таагүй зүйлсээ түр ч атугай мартагнаж эхэлдэг төдийгүй тайвшрана.

Гэхдээ зураг будах явдал сайн нөлөө үзүүлдэг тухай өгүүллэгүүд шинжлэх ухааны сонин сэтгүүлд хэвлэгдэж байгаагүй. Тиймээс ашиг сонирхлын үүднээс төлбөртэй нийтлэл хэвлэгдсэн байх магадлалтай гэх хүмүүс ч байна.

Учир нь нас бие гүйцсэн хүмүүст зориулсан буддаг зураг борлуулах явдал АНУ болон Европт ихээхэн дэлгэрсэн байдаг гэнэ.

Юутай ч зураг будаж буй хүмүүст эрдэмтэд хэмжилт хийж үзсэн байна. Тэдний зүрхний цохилт буурч тархины үйл ажиллагаа ч өөрчлөгддөг болохыг тогтоожээ.    

Эх сурвалж: Huffington Post