Дэлхийн хамгийн нэр хүндтэй авто шоуны нэг нь яах аргагүй Женевт болдог. Авто машин сонирхогч сая сая хүмүүсийн анхаарал өнгөрөгч долоо хоногийн турш Швейцарийн Женев хотод төвлөрч байлаа. Учир нь энд олон улсын нэр хүнд бүхий авто шоуг 79 дэх удаагаа зохион байгуулсан юм. Дэлхийн 85 автомашин үйлдвэрлэгчдийн 1000 гаруй брэндийн авто машин уг шоунд оролцсон нь томоохон тоон үзүүлэлт байлаа. Одоогоос 16 жилийн өмнө Парисын авто шоун дээр 4000 орчим төмөр хүлэг цугласан нь дээд амжилт байсан гэдэг. Түүнээс хойш 1000 давсан дөрөв дэх тохиолдол нь Женевт нээгдсэн олон улсын авто шоу ажээ.

Мэдээж энд 2010 оноос дэлхийн гол загвар болох зорилт тавьсан бүх төмөр хүлэг хүрэлцэн ирсэн байна. Европ төдийгүй Азийн авто машин сонирхогчдын анхаарлыг хамгийн ихээр татсан төмөр хүлэг нь алдарт "BMW Z4". Загвар нь энгийн хэрнээ хүчин чадлыг нь зүйрлэх ч юм биш. Ирэх оноос эхлэн хуучны загварын машинууд халаагаа өгч спортын шинэ эрин үе эхэлнэ гэдгийг Женевийн автошоу дэлхий нийтэд мэдрүүлэв. Нийт оролцогч машинуудын 90 орчим хувь нь спорт загварынх байжээ.