Өнөөдөр өрнөсөн онцлох таван үйл явдлыг хүргэж байна. 

-GoGo.mn сайтын “CEO цуврал” ярилцлагын зочноор ХААН банкны гүйцэтгэх захирал Жон Белл урилаа.

Америкийн зүрх гэгддэг Чикагод өнгөрүүлсэн түүний хүүхэд нас, өөрийгөө болон дэлхийг, харилцан адилгүй үзэл бодлуудыг танин мэдэж, уран зохиол, философид шимтсэн оюутан нас болон мэдээж хэрэг банкир болсон замналынх нь тухай "Хүн бусдаас суралцахаа зогсоосон цагт л тэтгэвэртээ гарах хэрэгтэй" ярилцагыг унших бол ЭНД дарна уу. 

-Ерөнхий сайд У.Хүрэлсүхийн хэвлэлийн төлөөлөгч "Ерөнхий сайд У.Хүрэлсүх УИХ-ын чуулганы 2018 оны 11 дүгээр сарын 06-ны өдрийн нэгдсэн хуралдаан дээр Жижиг, дунд үйлдвэрлэлийг хөгжүүлэх сантай нэр холбогдсон гишүүд хууль зөрчсөн эсэх асуудлыг хууль хяналтын байгууллага шалгаж тогтоох ёстой гэсэн байр сууриа илэрхийлсэн.

Гэтэл УИХ-ын гишүүн Д.Хаянхярваа бодит байдлыг зориуд мушгин гуйвуулж, Ерөнхий сайд У.Хүрэлсүх Жижиг, дунд үйлдвэрлэлийг хөгжүүлэх сангаас зээл авсан гишүүдээ хамгаалж байна гэж мэдэгдсэнийг албан ёсоор няцааж байна" хэмээв.

-Баянгол дүүргийн Хүүхдийн эмнэлэг энэ сарын 1-нээс эхлэн 24 цагаар үзлэг хийдэг болжээ. Хүйтний улирал эхэлж бага насны хүүхдийн ханиад томуу, томуу төст өвчин ихэсч байгаатай холбогдуулан ийнхүү цагийн хуваарьтаа өөрчлөлт оруулсан байна.


-Хятадын Синьхуа агентлаг хиймэл оюун ухаант нэвтрүүлэгчтэй болов. Синьхуа агентлагийн нэвтрүүлэгчдийн нүүрний хувирал, уруулын хөдөлгөөн зэрэгт үндэслэн дэлгэц дээр гарч буй дижитал нэвтрүүлэгчийг “амилуулдаг” байна.

Амралтгүй ажиллах чадалтай хиймэл оюун ухаант нэвтрүүлэгчтэй болсноор нэвтрүүлгийн зардал багасах, цаашилбал аливаа шуурхай мэдээг цаг хугацаанаас үл хамааран хүргэх зэрэг давуу тал бий болжээ.

-UBike энэ сарын 1-ний өдрөөс үйл ажиллагаагаа түр зогсоож, ирэх хавраас үргэлжлүүлэхээр болжээ.

Хүйтэн сэрүүний улирал эхэлж байгаатай холбогдуулан ийм шийдвэр гаргасан бөгөөд ирэх дөрөвдүгээр сараас үйлчилгээгээ үргэлжлүүлэх юм.