Монголын ойн салбарын шинэчлэл сэдэвт сургалт өнөөдөр боллоо.

Сургалтыг Словенийн элчин сайдын яамны дэмжлэгээр хэрэгжүүлж буй “Монголын ойн салбарын шинэчлэл” төслийн хүрээнд, Монголд ойн салбар үүсэж хөгжсөний 100 жилийн ойд зориулан зохион байгуулж байна.  Энэ үеэр Ойн газрын дарга Б.Оюунсанаа энэ онд хийсэн гол ажлуудаа танилцуулсан юм.  

Сүүлийн 20 жилд манай улсын нийт 1.6 сая орчим талбай хөнөөлт шавжийн улмаас доройтжээ. Тэрбум мод хөтөлбөрийн хүрээнд ойн салбарынхан доройтсон ойд илүүтэй анхаарч байна. Жил бүр 130-150 мянган га талбай ямар нэг байдлаар доройтдог. Үүний 8000-10 мянган гаг л нөхөн сэргээдэг байна.  

Ойн газар уул уурхайн компаниудтай хамтран эзэнгүй орхигдсон, доройтсон талбайнуудыг нөхөн сэргээж эхэлжээ. “Оюутолгой” Сэлэнгэ аймгийн Мандал суман дахь Ялбагийн талбайл биологийн болон техникийн нөхөн сэргээлтийг хийж дуусгасан. Дархан-Уул аймгийн Шарын гол суманд мөн 200 орчим га талбайг нөхөн сэргээж байна. Доройтсон ойг нөхөн сэргээхэд маш их хөрөнгө хэрэгтэй. Улсаас энэ онд ойн аж ахуйд нийт 35.9 тэрбум төгрөг төсөвлөжээ. Үүнд нөхөн сэргээлт, хөнөөлт шавжийн устгал, ойн түймэртэй тэмцэх, ойн арчилгаа гэх мэт бүх ажил багтсан. Үүний 13 тэрбум төгрөгийг нөхөн сэргээлтэд зарцуулж байгаа гэв.  
 
Ирэх онд эдгээр дүнг 36 тэрбум төгрөгөөс бууруулахгүй байх шаардлагатайг Б.Оюунсанаа дарга онцоллоо. Тэрээр “Хөнөөлт шавж тархах нь байгалийн зүй тогтол тул хэмжээ нь хэтэрсэн үедээ л аюултай байдаг. Сүүлийн жилүүдэд хөнөөлт шавж ихээхэн нэмэгдсэн нь уур амьсгалын өөрчлөлт, цар тахалтай холбоотой. Температур өсөхөөр шавж олшрох таатай нөхцөл бүрддэг. Цар тахлын жилүүдэд энэ ажил зогссон.

Энэ онд бид 380 мянган га талбайд газрын, агаарын техник ашиглан хөнөөлт шавж устгасан. Гол голомтуудыг дарлаа. Тархалтыг сайн дараад авбал цаашид хөнөөлт шавжтай тэмцэхэд хялбар болно. Бид шавж олшролын дээд цэгтээ хүрсэн, эсэхийг тогтоохоор судалж байна. Ер нь шавж устгалыг илүү зохион байгуулалттай хийхгүй бол бидний хүрч чадаагүй газрууд олон байна” гэв.