Үндэсний эвслийн тэргүүн Н.Номтойбаяр сэтгүүлчдэд мэдээлэл хийлээ.

Тэрбээр “Үндэсний эвслийг дэмжиж, эвслийн нэр дэвшигчдийг дэмжсэн бүх иргэд, сонгогчдодоо баярлалаа. Амаргүй сонгууль байсныг та бүхэн сайн мэдэж байгаа. Тойрогт нэр дэвшсэн, сэтгэлээрээ зүтгэсэн олон нэр дэвшигчид бий, бүгдэд нь талархаж байна.

Би шулуухан хэлье, хулгайч нарт өс зангидна.

Үндэсний эвсэл байгуулагдаад гуравхан сар болсон ч цаашид хамтдаа явах баг, бүрэлдэхүүнийг бүрдүүлж чадлаа. Тэнцвэргүй тулаанд өрсөлдөнө гэдэг амаргүй. Хууль, хүчний байгууллагаас алхам тутамд дэгээ тавьсан. Өрсөлдөөн нэртэй л хүч тэнцвэргүй сонгууль боллоо, үнэндээ өрсөлдөх ямар ч боломж олгосонгүй шүү дээ. Сүүлд хэвлэлд ярилцлага өгөхдөө би ноцтой хэд, хэдэн асуудал дурдсан. Би хоосон үг хэлэхгүй. Нотлох баримтууд бий.

“Хар машин” буюу сүлжээний тооллогоор явдаг энэхүү программд хөндлөнгийн аудит хийх цаг нь болсон. Үндэсний эвсэлд ирэх саналыг саармагжуулах олон үйл ажиллагаа явагдсан. Энэ бүгдийг бид цаг тухайд нь хэвлэлд мэдээлж, Монголын сонгууль дахин элдэв луйваргүй байх тогтолцооны төлөө Үндэсний эвсэл ажиллах болно гэдгийг мэдэгдье.

Үндэсний эвслийн үйл ажиллагаа дөнгөж эхэлж байна, бид УИХ-ын босгыг хуульд заасны дагуу давж багагүй хэдэн суудал авах болзол хангалаа. Би шулуухан хэлье, хулгайч нарт өс зангидна” гэв.