Өнөөдрийн байдлаар Монгол орны нийт газар нутгийн хөрсний доройтлын түвшин 76.8 хувьтай байна.

2080 он гэхэд Монгол орны нийт газар нутгийн 92 хувь нь хөрсний доройтолд орохоор байна гэж Азийн Хөгжлийн банк шинэ тайландаа мэдээллээ. Одоогоор  нийт газар нутгийн хөрсний доройтлын түвшин 76.8 хувь байгаатай харьцуулахад эрс нэмэгдэхээр байна.

Мөн дээрх судалгаанд Монгол Улсыг цаг уурын өөрчлөлт, эрс тэс байдалд тохирохуйц зам, барилга дэд бүтцийг хөгжүүлж, уур амьсгалын өөрчлөлтөд хөдөө аж ахуйн салбарыг уян хатан байдлаар дэмжихийг зөвлөжээ.

Үүнээс гадна бэлчээрийн менежментийг сайжруулах, малд нэмэлт тэжээл өгөх зэрэг цаг уурын нөхцөлдөө таарсан, хөдөө аж ахуйн арга техникүүдийг хэрэгжүүлснээр эдийн засгийн хувьд ашигтай байх боломжтой гэж мэдээлсэн байна.

Өнгөрсөн жилүүдэд зудын улмаас олон сая тоо толгой мал хорогдсон бөгөөд энэ нь уур амьсгалын өөрчлөлтөөс үүдэн улам хүндрэх, давтамж нь ихсэх хандлагатай байгааг Азийн Хөгжлийн банк онцоллоо.

Мөн Монгол Улс хөгжиж буй орнуудын дунд тогтвортой санхүүжилтийг хэрэгжүүлэх чиглэлээр ахиц дэвшил гаргасаар байгааг дурджээ. Түүнчлэн ахисан түвшинд хүрсэн цөөхөн орнуудын нэгээр үнэлэгдсэн байна.

Үүнээс гадна Монгол Улс санхүүгийн салбарт хөрөнгө оруулалтын нийгмийн болон тогтвортой зээлийн түвшнийг нэмэгдүүлэх боломжоо ахиулсаар байгааг тодотгосон байна.

Б.Есүйхулан