Улаанбаатар хотноо зохион байгуулагдсан “Дэлхийн эмэгтэйчүүдийн чуулга уулзалт”-ын хүрээнд  “Манлайллын 17 төрх” гэрэл зургийн үзэсгэлэн Чингис хааны үндэсний музейд наймдугаар сарын 22-ноос есдүгээр сарын 22-ны хооронд дэлгэгдэж байна.

НҮБ нь 2022 оноос Тогтвортой хөгжлийн 17 зорилгыг хэрэгжүүлэхэд дэлхийн эмэгтэйчүүдийн оруулж буй хувь нэмрийг харуулах зорилгоор цуврал үзэсгэлэнг зохион байгуулдаг. Уг үзэсгэлэнг өмнө нь Вьетнам, Гүрж, Португал зэрэг найман улсад гаргаж байжээ. Ес дэх цуврал үзэсгэлэнг  зохион байгуулах болсон Монгол улсын хувьд НҮБ-ын Женев дэх төв, Швейцарын Эмэгтэйчүүдийн нийгэмлэгтэй хамтран салбар салбартаа манлайлсан 17 эмэгтэйг онцлон, гэрэл зургийн үзэсгэлэн дэлгэж байна.

Тус үзэсгэлэнгийн үзэгч Д.Батчимэг: “Монгол улсдаа бүхий л чиглэлээр эмэгтэйчүүдийн нөлөөлөх байр суурь жил ирэх тусам нэмэгдэж буй нь сайшаалтай. Аль ч салбарт эмэгтэйчүүд ажиллахад олон саад бэрхшээлүүд тулгардаг. Намайг анхны жилээ ажиллахад эмэгтэй физикийн багш гэхэд “эвэртэй туулай” үзсэн аятай л ханддаг байсан. Тухайн үед физик, математик гээд тоо томьёо орсон л бол эрэгтэйчүүд санаанд нь буудаг үе. Одоо цаг өөр болжээ багш, сувилагч цаашлаад жижиг, дунд бизнес эрхлэгчдийн ихээхэн хувийг эмэгтэйчүүд эзэлж байна” гэлээ.

МОНГОЛ УЛСЫН НИЙГЭМ, ЭДИЙН ЗАСАГТ ҮНЭТЭЙ ХУВЬ НЭМЭР ОРУУЛСАН “МАНЛАЙЛЫН 17” ТӨРХӨӨР НЭРЛЭГДЭЖ БУЙ ЭМЭГТЭЙЧҮҮДИЙГ ТАНИЛЦУУЛЪЯ.

1. Л.Эрдэнэчимэг- Эрүүл мэндийн салбарт 30 гаруй жил ажиллаж, 3000 гаруй эмэгтэйчүүдийг ажлын байраар хангасан
2. С.Цэцгээ- Монгол Улсын Хүнс, хөдөө аж ахуйн салбарт 42 жил ажиллаж байгаа
3. Др,Проф.А.Алтанцэцэг- Монголын уламжлалт анагаах ухааныг хөгжүүлэх, түгээн дэлгэрүүлэх, эрдэм шинжилгээний ажилд бүтээлчээр оролцож ирсэн туршлагатай
4. Д.Тунгалаг- Боловсролын салбарт 20 гаруй жил ажилласан туршлагатай
5. Д.Мөнхөө- Хөдөөгийн эмчээс ажлын гараагаа эхэлж, салбарын орлогч сайд, хууль тогтоох дээд байгууллагын гишүүнээр ажилласан
6. Э.Энхгэрэл- Усны хомсдолоос сэргийлэх зорилгоор хэрэгжүүлж буй бүтээн байгуулалтын төслийг удирдагч
7. А.Оюун-Эрдэнэ- Сэргээгдэх эрчим хүчний инженер
8. Б.Юмжирмаа- Байгаль орчин, аялал жуулчлалын чиглэлд 10 гаруй жил ажилласан туршлагатай
9. Д.Хулан- “Таван Богд” групп үүсгэн байгуулагч , Монголын хамгийн том ноолууран бүтээгдэхүүн үйлдвэрлэгч “Говь” компанийн ТУЗ-ийн гишүүн, хувьцаа эзэмшигч
10. Х.Зауреш- Баян-Өлгий аймгийн “Арулар” эмэгтэйчүүдийн нийгэмлэгийн гүйцэтгэх захирал
11. З.Туяа- Ээлтэй хотыг бий болгох, иргэдийн оролцоог ханган шинэчлэлийг хийхийг зорьж байгаа архитектур, хот төлөвлөлтийн мэргэжилтэн
12. Ч.Ганцэцэг- Байгаль орчинд ээлтэй, хариуцлагатай үйлдвэрлэл эрхлэн ажлын байрыг нэмэгдүүлж байгаа “Ханбогд кашмер” компанийн үүсгэн байгуулагч
13. С.Оюун- Монгол Улсад тохирсон ногоон эдийн засгийн хэтийн бодлогын үндсийг тавихад манлайлан оролцсон. Уур амьсгалын ногоон сангийн Гадаад харилцааны дарга
14. А.Дулмаа- Монгол Улсын Шинжлэх Ухааны гавьяат зүтгэлтэн, академич, профессор
15. Б.Эрдэнэчимэг- Ойн салбарын байгууллагуудад тасралтгүй 30 жил ажилласан
16. Г.Болор- Монгол Улсын анхны эмэгтэй генерал
17. Д.Гэрэл- НҮБ-ын Хөгжлийн бэрхшээлтэй хүмүүсийн эрхийг хамгаалах хорооны гишүүн зэрэг эмэгтэйчүүдийн гэрэл зураг дэлгэгдсэн байна.

Б.Маралмаа