Байгаль орчин, уур амьсгалын өөрчлөлтийн яам (БОУАӨЯ) 2025 оныг хөв цөөрөм байгуулах жил болгон зарлаж, тэр дундаа 333 нуур, "1 сум-1 нуур" уриалгыг дэвшүүлж байгаа талаар Усны газрын дарга З.Батбаяр мэдээллээ.

Уст намгархаг газар алга болж, гол мөрөн хатаж ширгэж байна. Энэ нь үерийн аюул нэмэгдэж байна гэсэн үг. Жишээ нь Сэлбэ гол дээр халиа дошин үүсэх магадлалтай байна. Энэ бүгдээс сэргийлэхэд усны нөөцийн хуримтлал бий болгох шаардлагатай. Усны газрын санаачилгаар 333 нуур хөтөлбөрийг хэрэгжүүлэхээр ажиллаж байна. Энэ нь Монгол Улсад байгаа сум бүрд нэг нууртай болгох зорилготой юм.

Энэ жил дунджаар гуравны хоёрт хур тунадас орлоо. Түүнийг хуримтлуулж сайр, булаг шанд бүрд хөв цөөрөм байгуулах юм. Бид хиймэл дагуулаас зураг авахад зөвхөн өндөрслийн ялгаагаас шалтгаалаад 54 мянган цөөрөм байгуулах боломжтой тооцоолол гарсан. Ийнхүү сум бүрд хүрч ажиллах боломжоо харгалзан 318 хөв цөөрөм байгуулах боломжтойг тооцоолсон ба энэ нь дараах байдлаар ашиглагдана.

• хүн амын усан хангамж
• мал аж ахуйн усан хангамж
• газар тариалангийн усан хангамж
• үерийн уснаас хамгаалах
• бусад усны хэрэглээг нэмэгдүүлэх, экологийн тэнцвэрт байдлыг дэмжихэд чиглэх юм.

1. Булаг шанд, жижиг горхины хөл дагасан хөв цөөрөм. 3-4 метрийн өндөртэй далан барьж, 200мХ600м харьцаатай, 1.5 метр өндөртэй 500 мянган куб метр ус цуглуулж хөв цөөрөм байгуулна.
2. Хуурай сайр жалгыг дагасан хөв цөөрөм нь үерийг усыг зайлуулна.
3. Газар доорх усны нөөцийг тэтгэх замаар нэмэгдүүлэх гэсэн гурван хувилбар гаргаад байгаа ба санхүүгийн байдлыг тооцоолж байна.

Хөв цөөрөм байгуулах зургуудыг гаргаж байгаа барилга байгууламжийн ажлыг ирэх онд буюу газар гэсэх цагаар эхлүүлэхээр төлөвлөж байна гэв. Нэг хөв цөөрмийг 150 мянган ам.доллар буюу 400-500 сая төгрөгөөр байгуулна. Булган аймаг, Өмнөговь, Дорнод аймгаас эхэлнэ. Улсын төсөв, гаднын санхүүжилт, аж ахуй нэгж байгууллагын дэмжлэгээр санхүүжилтийг бүрдүүлнэ. Улсын төсвөөс 13 тэрбумыг зарцуулахаар байна.