Монголын Эрүүл мэндийн ажилтны үйлдвэрчний эвлэлийн холбооноос “Иргэд эрүүл мэндээрээ, эмнэлгийн ажилтнууд амьдралаараа хохирч болзошгүйг анхааруулъя” сэдвээр мэдээллээ. 

Монголын эрүүл мэндийн ажилтны үйлдвэрчний эвлэлийн холбооны дарга Ч.Нарантуяа:
- Өчигдөр 100 гаруй идэвхтэн оролцсон манай 5 дугаар зөвлөл хуралдсан. Түүнээс гарсан шаардлагуудыг УИХ, ЗГ-т хүргэхээр энэхүү хэвлэлийн бага хурлыг хийж байна.

Цэцэрлэгийн хүүхдүүдээ квотоор сугалуулж хамруулдаг байсан, одоо бид үзэх өвчтөнөө сугалах нь холгүй байна.

Гүйцэтгэлийн санхүүжилт эхлээд 4 жил болсон ч сайнтай муутай олон үр дүн гарч байна. Хэрэв энэ нь жинхэнээсээ санхүүжилт болоод, эмч ажилтнуудын нийгмийн байдал, амьдрал ахуй сайжирч байгаа бол үр дүн хангалттай гэж дүгнэхээр байлаа.

Гүйцэтгэл хүрэхгүй байгаа тул эрүүл мэндийн санхүүжилтээ авч чадахгүй байна. Нэг эмнэлэгт доод тал нь ₮2 тэрбум, дээд тал нь ₮5-6 тэрбум төгрөгөөр санхүүжилт дутаж байгаа юм. Мөн эмнэлэгт өр үүсэж, цаашид ажиллах нөхцөл байдал хүндэрч, цомхотгол хийж эхэлсэн. Хоёр тасгийг нэгтгэж, ажилтнуудын ажлын ачаалал нэмэгдэж байна. Квот тогтоосон тул үйлчлүүлэгчээс ирэх ажлын байрны дарамт их байна. Зарим нь "Чи надад үйлчилсэнгүй, харж үзсэнгүй" гэж уурладаг, бүр лайв ч хийнэ.

Алсын дуудлагад явдаг эмч ажилтнуудын томилолтын асуудал хангагдаагүй, буудалд хонож чаддаггүй. Аймгуудад хоёр жолооч алсын дуудлагад явдаг, алжаалаа тайлж чадахгүй явж байгаад аваар осол гаргавал яах вэ.

Манай ҮЭХ-ноос жил бүрийн 5 дугаар сард өөрсдийнхөө төлөө дуу хоолойгоо хүргэж, салбарын шинэчлэлийн төлөө хамтдаа хөгжих шаардлагатай байна. Эмч нар сарын дунджаар 2 сая төгрөгийн цалинтай, илүү цагаар ажиллавал жаахан илүү гарна.  Гэтэл ТҮК-ийн үйлчлэгч нар 3,5 сая төгрөгийг цалинтай байна. Тиймээс 8-9 сард жагсаал цуглаанаа албан ёсоор хийж, дуу хоолойгоо хүргэнэ. Бидний өнөөдрийн мэдээллийг бүү улс төржүүлээрэй.

Дараах шаардлагыг хүргүүлж байна.

• Нэг иргэнд ногдох зардал 2022 оноос хойш нэмэгдээгүй. Тиймээс үүнийг нэмэх шаардлагатай. 
• Анхан шатны өрхийн эмнэлгийн ачаалал их, хүний нөөц дутагдаж байгаа. Залуус ажиллахаа байсан тул ахмад эмч нарыгаа эргээд ажиллуулж байна
• Өрхийн эмнэлэгт орон нутгийн 40 хувийг нэмэгдүүлэх шаардлагатай.
• Сумын эмнэлгүүдэд маргаантай асуудал үүссэн. Жишээ нь сумын эмнэлэгт өдөрт хоёр хүний шүд үзэх, сард 30 хүн хэвтэх боломжтой гэдэг квоттой болгосон. Тиймээс энэ мэт хязгаараа болиулахыг шаардаж байна. Цэцэрлэгийн хүүхдүүдээ квотоор сугалуулж хамруулдаг байсан, одоо бид үзэх өвчтөнөө сугалах нь холгүй байна. Эрүүл мэндийн салбарыг квоттой болгож болохгүй.