УИХ-ын чуулганы нэгдсэн хуралдаан 2025.06.12-13-нд шилжих шөнө болж, Ерөнхий сайдад нэр дэвшсэн Г.Занданшатарыг хуралдаанд оролцсон гишүүдийн олонх дэмжив. 

Тэрээр 2024 оны парламентын сонгуулиар нэгдүгээр тойрог буюу Архангай, Өвөрхангай, Баянхонгор аймгуудад өрсөлдсөн юм. Нийт 53,649 сонгогч буюу 42 хувийн саналыг авсан ч УИХ-ын гишүүний болзлыг хангаагүй юм. Гэсэн ч тэрээр Засгийн газрыг тэргүүлэх болов.   
     
Ерөнхий сайд Г.Занданшатарын хөрөнгө орлогыг танилцуулж байна. 

 
Тэрээр 1.1 тэрбум төгрөгийн орон сууц, барилгатай. Нийтийн орон сууц, зуслангийн байшин, үйлчилгээний зориулалтын нэг байгууламжтай. Эдгээр нь нийт 1 тэрбум 175 сая төгрөгийн үнэлгээтэй гэж 2023 онд мэдүүлжээ. Энэ дүн 2020 оноос хойш өөрчлөгдөөгүй. Тэрээр жилд 84 сая төгрөгийн орлоготой бол гэр бүл нь 254 сая төгрөгийн орлоготой. Ниссан Мурано авто машинаа 80  сая төгрөгөөр худалдан авчээ. 

15 сая төгрөгийн таван адуу, 130 сая төгрөгийн үнэт эдлэл, урлаг, түүхийн үнэт зүйл эзэмшдэг. 2022 оноос хойш түүний хадгаламж хоёр дахин өсөж, 112 саяас 286 сая төгрөгт хүрчээ.

Мэдүүлэг гаргагчийн нэг жилийн нийт орлого
2019 он - 124 сая төгрөг 
2020 он - 506 сая төгрөг ⬆️
2021 он - 60 сая төгрөг ⬇️
2022 он - 58 сая төгрөг ⬇️
2023 он - 84 сая төгрөг ⬆️

Мэдүүлэг гаргагчийн гэр бүлийн орлого 
2019 он - 74 сая сая төгрөг 
2020 он - 85 сая төгрөг ⬆️
2021 он - 217 сая төгрөг ⬆️
2022 он - 268 сая төгрөг ⬆️
2023 он - 254 сая төгрөг ⬇️
   
Түүний эзэмшдэг компаниудын тухайд

Ерөнхий сайд Г.Занданшатар "Монитор консалтинг групп"-ийн 1000 ширхэг хувьцааг 2022 оноос хойш эзэмшжээ.

Энэ компанийг 2011.05.19-нд байгуулсан, Хан-Уул дүүргийн нэгдүгээр хороонд бүртгэлтэй. Хувьцаа эзэмшигч нь Ганбаярын Отгонгэрэл буюу түүний гэргий.

Бизнесийн зөвлөгөө, сургалт, судалгааны чиглэлээр үйл ажиллагаа явуулдаг байна. Гэхдээ энэ компани цахим хуудасгүй, нүүр номд хаяггүй.       
  
Г.Отгонгэрэл "Нэгүн кашмер" компанийн хувьцааг мөн эзэмшдэг. Тэрээр Завхан аймгийн Дөрвөлжин сумын уугуул. 1974 онд төрсөн. Зургаан хүүхэдтэй айлын тав дахь нь. Г.Занданшатартай Зах зээлийн коллеж буюу одоогийн Худалдаа үйлдвэрлэлийн дээд сургуульд багшилж байхад танилцсан, 1992 онд гэр бүл болжээ.

Г.Отгонгэрэл санхүүч мэргэжилтэй. Их Британи, Умард Ирландын Нэгдсэн Вант Улсын Бирмингэмийн их сургуульд бизнесийн удирдлагын магистрын зэрэг хамгаалсан. Тэд хоёр хүү, хоёр охинтой.

Г.Занданшатарын 49 хувийг нь эзэмшдэг "Нэгүн кашмер" компанийг 2017.12.11-нд байгуулжээ. Энэ компанийн бас нэг хувьцаа эзэмшигч нь Батсуурийн Гантуяа.       

Г.ЗАНДАНШАТАРЫН 2024 ОНЫ СОНГУУЛИЙН ЗАРДЛЫН ТАЙЛАН 

Нийт орлого - 1 тэрбум 889 сая төгрөг  
Хуулийн этгээдийн өгсөн мөнгөн хандив - 350 сая төгрөг  
Иргэдийн өгсөн хандив -  889 сая төгрөг 
Сонгуулийн зардал - 168 991 200 төгрөг
Сонгуулийн сурталчилгааны материал хэвлүүлэх, тараах - 116 991 200
Сонгуулийн сурталчилгаанд радио ТВ ашиглах - 52 000 000 төгрөг
Бусад зардал -   232 377 700 төгрөг
Үлдэгдэл -  487 531 499 төгрөг
Нийт зардал - 401 368 900 төгрөг
Хуулиар зөвшөөрөгдөөгүй хандив - 350 000 000 төгрөг      
Буцаасан дүн  - 1 000 310 499 төгрөг (Гүйлгээний утга алдаатай байсан гэх мэт шалтгаанаар буцаажээ.)

Сонгуулийн тухай хуульд зааснаар

• Мөнгөн хандив нь иргэний хувьд арван сая төгрөг хүртэл, хуулийн этгээдийн хувьд гучин сая төгрөг хүртэл байна.
• Хандив өгч байгаа иргэний нэр, иргэний бүртгэлийн дугаар, хуулийн этгээд нь нэр, регистрийн дугаар болон хандивын эх үүсвэрийн талаарх мэдээллээ банкны гүйлгээний баримтад тусгах бөгөөд энэ шаардлагыг хангаагүй хандивыг хандив хүлээн авагч буцаан шилжүүлнэ.
• Буцах хаяг нь тодорхойгүй хандивыг холбогдох хууль тогтоомжийн дагуу улсын орлогод буюу төрийн санд шилжүүлнэ.
• Хуулийн этгээд мөнгөн хандив өгсөн бол уг хандивыг санхүү, татварын тайландаа тусгана.
• Бэлэн мөнгөөр хандив өгөх, авахыг хориглоно.