БНХАУ-ын Баруун хойт бүсийн Хөдөө аж ахуй, ой судлалын их сургуулийн ректор Сун Вушие тэргүүтэй төлөөлөгчид Хөдөө аж ахуйн их сургуульд энэ сарын 2-4-ний хооронд айлчиллаа.

Энэ үеэр хоёр их сургуулийн удирдлага уулзан цаашид хэд хэдэн чиглэлээр хамтран ажиллах гэрээ байгуулан гарын үсэг зурсан юм.

Дээрх ёслолын ажиллагаанд БСШУЯ-ны Шинжлэх ухаан, технологийн газрын дарга, Хөдөө аж ахуйн шинжлэх ухааны академийн дэд ерөнхийлөгч Ө.Сүхбаатар, ХХААХУЯ-ны Стратеги төлөвлөлт, бодлогын газрын дарга, Хөдөө аж ахуйн шинжлэх ухааны академийн дэд ерөнхийлөгч П.Баянмөнх болон ХААИС-ийн удирдлага оролцов.

Гэрээнд оюутан солилцооны болон сургалт, эрдэм шинжилгээ, үйлдвэрлэлийн чиглэлээр өргөн хүрээнд хамтран ажиллахаар тусгажээ.

БНХАУ-ын Хөдөө аж ахуй, ой судлалын их сургууль нь 80 шахам жилийн түүхтэй тус улсын ууган их сургуулиудын нэг. Бүрэлдэхүүндээ 19 коллежтэй, 4582 багш, ажилчин, 27 мянган оюутан суралцдаг. Бакалаврын 64, магистрын 105, докторын 75 хөтөлбөрөөр сургалт явуулдаг 284 профессор, 397 дэд профессор зэрэг цолтой багш ажилладгийн дээр өнгөрсөн 75 жилийн хугацаанд зуун мянга гаруй оюутан бэлтгэн гаргажээ.

Б.Мягмансанж http://www.niigmiintoli.mn/