Хил хамгаалах ерөнхий газар нь Буйр нуурын усан хилийн хамгаалалтад онцгой анхаарч "Усан хилийн хамгаалалт" төсөл хэрэгжүүлж эхэлжээ. Монгол Улсын дархан хил 8252.658 км үргэлжилдгээс хуурай газраар 7348.5 км, усаар 904.058 км хиллэдэг байна. Үүнээс Хилийн цэргийн 0306 дугаар анги хариуцсан хэсэгт байрлах Буйр нуур нь БНХАУ-тай 30.7 км усаар хиллэдэг аж.

Уртаараа 34 км бол өргөнөөрөө 23 км үргэлжилдэг Монгол орны томоохон нууруудын нэг аж. Загас агнуурын үе эхлэхэд өмнөд хөршөөс Буйр нуураар дамжин усан хил зөрчигчид ихсэх хандлагатай болдог байна. Тиймээс тус нуурыг найдвартай хамгаалах шаардлага бий. Энэ байдлыг харгалзан Хил хамгаалах ерөнхий газрын дарга ОХУ-д ажлын айлчлал хийх үеэрээ "Аист" маркийн хөнгөн хөлөг онгоц тусламжаар хүлээн авч, мөн тус улсад үйлдвэрлэгдсэн "Стрелец 2" газар уснаа явагчийг худалдан авчээ.

Улмаар тэдгээр техникийг хэрхэн ашиглах талаар ОХУ-ын Хил хамгаалах албанаас дэд хурандаа Волков Денис Леонидовичаар ахлуулсан хөнгөн хөлгийн дөрвөн мэргэжилтнийг урьж, хилчдэд сургалт зохион байгуулснаар Буйр нуур усан хилийн найдвартай хамгаалалтад шилжжээ.