Нийслэлийн зарим гудамж талбайн замыг маргаашнаас эхлэн сэтлэх юм байна.

Мөн баруун дөрвөн замаас зүүн дөрвөн зам хүртэлх замыг хаахаар болжээ. Маргаашнаас эхлэн наймдугаар сарын 30-ны хооронд Энтайваны өргөн чөлөө буюу зүүн дөрвөн замаас баруун дөрвөн замын уулзвар хүртлэх 3.48 км үргэлжилсэн замд давхар хучилт хийж, шинэчлэх гэж байна.

Иймд тус хэсгийн замын дагуух хоёр талын нэгдүгээр эгнээг хаах ажээ. Түүнчлэн аравдугаар сарын 8-н хүртэл нэлээд хэдэн томоохон зам, талбайд засварын ажил хийхээр төлөвлөгджээ. Тухайлбал, энэ сарын 7-10-ныг дуустал Чоймболын гудамжны замд засвар хийх тул иргэдийн нэрлэж заншсанаар баруун дөрвөн замаас 26 дугаар чиглэлийн автобус эргэж “Бөмбөгөр” худалдааны төв ордог уг гудамжийг хаах аж.

Мөн баруун дөрвөн замаас мэргэжилтний 20-ын автобусны буудал хүртлэх замыг хаах юм байна. Эдгээр замыг хааж байгаатай холбоотойгоор хөдөлгөөний ачаалал нэмэгдэх нь тодорхой. Тиймээс жолооч нар “Нарны зам”, Энэбишийн өргөн чөлөө, Ард Аюушийн гудамж, Хувьсгалчдын өргөн чөлөө зэрэг бусад замыг сонгон хөдөлгөөнд оролцохыг ЗЦГ-аас анхааруулж байна.

Долоон газар зам сэтэлнэ
Маргаашнаас Баянгол дүүргийн VIII хорооны нутаг, Чингүнжавын гудамж буюу бидний ярьж заншсанаар “Өргөө” кино театраас доошоогоо уруудаад UB паласын уулзвар хүртлэх зам, мөн Чингэлтэй дүүргийн VII хорооны нутаг, Энэбишийн гудамж буюу Гэсэр сүмийн уулзвараас Баянбүрдийн уулзвар хүртлэх 51.7 м үргэлжлэх авто замыг сэтлэх аж.

Зам сэтлэхтэй холбоотойгоор эдгээр замыг шөнөдөө бүхэлд нь, өдөртөө хэсэгчилэн хаах юм байна. Тиймээс жолооч нарыг эдгээр замаар хөдөлгөөнд оролцохгүй байхыг холбогдох байгууллага компанийнхан сануулэж байна.

Түүнчлэн Үндсэн хуулийн гудамжны авто зам, Бөхийн өргөөний зүүн хойд тал, УИД-ийн зүүн талын авто замыг сэтлэхээр болжээ.

Зам сэтлэх ажлыг ихэвчлэн 22.00-07.00 цагт хөдөлгөөний ачаалал багассан үед, ачаалал ихтэй замуудад амралтын өдрүүдэд хийх юм байна.

Б.Тэлмэн