Өнөөдөр Онцгой байдлын албаны өдөр тохиож байна. Энэ баярын өдрийг тохиолдуулан Онцгой байдлын албанд шинээр томилогдсон алба хаагчдаар төрийн тусгай алба хаагчийн тангараг өргүүлэх ёслол болно.

Аврах тусгай ангийн жагсаалын талбайд болох тангараг өргөх ёслолын ажиллагаанд нийт 130 гаруй алба хаагч оролцоно.

Мөн ОБЕГ-ын харьяа Аврах тусгай анги өнөөдрөөс эхлэн ОХУ-ын Онцгой байдал, Иргэний хамгаалалтын яамны бүтцэд ажилладаг төв аврах бригад, БНСУ-ын Үндэсний аврах бригад-119 зэрэг ижил төрлийн үйл ажиллагаа явуулдаг олон улсын байгууллагуудын жишгээр өөрийн улсдаа төдийгүй бүс нутаг, олон улсад үүрэг гүйцэтгэх Үндэсний аврах бригадын бүтцээр ажиллаж эхэлнэ.

Онцгой байдлын албаны өдрийг тохиолдуулан тус ангийн бие бүрэлдэхүүнд Үндэсний аврах бригадын тугийг гардуулан өгөх ёслолын ажиллагаа өнөөдөр мөн болох юм.