Нийгмийн эерэг өөрчлөлтийн төлөө уриатай "JCI Монгол" байгууллагын энэ оны Үндэсний Ерөнхийлөгч Ц.Баатарбилэгийн орон нутгийн айлчлал Эрдэнэт, Дархан хотуудад өнгөрсөн сарын 28-аас энэ сарын 3-ны өдрийг хүртэл амжилттай зохион байгуулагдлаа. Айлчлалын бүрэлдэхүүнд уг байгууллагын үе үеийн Ерөнхийлөгчид, удирдлагын баг, гишүүдийн төлөөлөл оролцсон байна.

“JCI Монгол” байгууллага нь 1992 онд хөдөлгөөн хэлбэрээр үүсч, өдгөө 600 орчим гишүүнтэйгээр үндэсний хэмжээний байгууллага болж өргөжжээ. Эрдэнэт, Дархан хотод зохиогдсон сургалт уулзалтад нийт 200 орчим гишүүд, сонирхогч залуус оролцсон бөгөөд бизнесийн хөрөнгө оруулалт, хувь хүний имиж, жижиг дунд үйлдвэрлэлийн зээл, тусламжид хэрхэн хамрагдах, бүтээлч сэтгэлгээ, шинэ санааг хэрхэн төрүүлэх вэ гэдэг талаар сонирхолтой сургалтуудыг явуулсан ажээ.

“Ухаалаг Монгол хүн” сэдвээр эдийн засагч Д.Жаргалсайхан, Жижиг дунд бизнесийн зээлд хэрхэн хамрагдах талаар ЖДҮХГазрын дарга Б.Бат-Амгалан, “JCI Mission Vision Value” сэдвээр Г.Баярхүү, хувь хүний имиж сэдвээр “Common coach” компанийн захирал Д.Наранцэцэг, Бүтээлч сэтгэлгээг хэрхэн хөгжүүлэх тухай сэдвээр Лектор төвийн багш н.Мөнгөнбаяр нар лекц уншсан юм байна.

Харин орон нутгийн залууст өгөөжтэй, цаг үеэ олсон сургалт болсон талаар оролцогчид хэлж байжээ.

Мөн Эрдэнэт, Дархан хотуудын Засаг дарга, Эрдэнэт, Дарханы JCI салбарын УЗ-ийн гишүүдтэй хийсэн уулзалтууд амжилттай болсон бөгөөд эдгээр уулзалтын үеэр орон нутгийн хөгжилд эерэг өөрчлөлтийг авчрах төсөл хөтөлбөрт хамтран ажиллах, санамж бичигт гарын үсэг зурж, мөн салбар байгууллагуудын төслүүдтэй танилцсан байна.

Энэхүү айлчлал нь цаашид орон нутаг дахь “JCI Монгол” байгууллагын гишүүдийг өргөжүүлэх, гишүүдээр дамжин нийгэмд эерэг өөрчлөлтийг бүтээх зорилгод бодит үр дүнгээ өглөө.

JCI ТББ-аас мэдээллээ.