Удирдах албан тушаалтан нь өөрчлөгдөж хөл хөдөлгөөн ихтэй байгаа цагдаагийн байгууллагынхан “Цагдаагийн байгууллагын шинэчлэл” сургалт зөвлөгөөнийг зохион байгууллаа.

Төв болон хөдөө орон нутгийн 120 гаруй удирдах албан тушаалтан оролцож буй энэхүү сургалт зөвлөгөөнөөр цагдаагийн байгууллагад тулгамдаж байгаа гол асуудал, гарах арга зам, зайлшгүй хийгдэх ёстой ажлын талаар зөвлөлдсөн юм.

Сургалт зөвлөгөөнд оролцож буй удирдах албан тушаалтнуудад ЦЕГ-ын дарга, Дотоодын цэргийн командлагч, хурандаа Б.Билэгт шинэчлэлийн Засгийн газар, Хууль зүй яамнаас цагдаагийн байгууллагын шинэлчлэл болон гэмт хэрэгтэй тэмцэх талаар авч хэрэгжүүлж байгаа ажлын талаар танилцуулж, үүрэг чиглэл өгсөн.

Түүнчлэн энэ зөвлөгөөнөөр удирдах албан тушаалтнуудын ярьж байсан гол сэвдийн нэг бол цагдаагийн байгууллагын боловсон хүчин. Дотоодын их сургууль төгссөн оюутнуудаас жилд нэг удаа гурван цагдааг аймаг бүрт томилон явуулдаг. Гэхдээ эдгээр цагдаа нар нь нэг хоёр жил ч бололгүй ямар нэгэн шалтаг шалтгаан хэлээд л төв газраа бараадаад явчихдаг байна.

Мөн цагдаа нарын боловсролд анхаарах ёстой гэдгийг ч хэлж байсан юм. Энэ үеэр зарим аймгийн цагдаагийн байгууллагын дарга нараас гэмт хэргийн гаралт, авах арга хэмжээний талаар сонирхсон юм.

Ховд аймгийн Цагдаагийн газрын дарга, хошууч Ж.Дөлбадрах

-Ховд аймгийн хувьд гэмт хэргийн гаралт зарим аймгуудтай харьцуулахад харьцангуй бага санагддаг?
-Сүүлийн таван жилд хийсэн судалгааг харахад Ховд аймагт гарах гэмт хэргийн гаралт буурсан гэх үзүүлэлттэй байгаа. 2011 онтой харьцуулахад 2012 оны эхний арван сарын байдлаар гэмт хэрэг 15 хувиар буурсан үзүүлэлттэй байна. Гэхдээ гэмт хэргийг ангилалаар нь авч үзэхэд гудамжинд үйлдэгддэг гэмт хэрэг 19.3 хувиар өссөн.

-Хөдөө орон нутагт ажиллах боловсон хүчин гол асуудал болж байгаа талаар өнөөдрийн зөвлөгөөнөөр яригдаж байна. Энэ талаар?
-Цагдаагийн байгууллагад боловсон хүчин чухал асуудал болчихоод байгаа нь үнэн. Хөдөө орон нутагт ажиллах залуус олдохгүй байгаа нь тэдний нийгмийн асуудалтай шууд холбоотой. Тиймээс шинээр томилогдон ирж байгаа залууст байр орон сууц гээд нийгмийн амьдралд нь анхаарлаа хандуулах хэрэгтэй. Үүнийг ажил хэрэг болгож төсөв мөнгө гаргаж заавал хийх ёстой ажил.

-Дөргөн суманд алт гарснаас болж цагдаа иргэдийн хооронд маргаан үүсч, цагдаа нар буудна хэмээн айлгаж сүрдүүлсэн гэсэн?
-Энэ сарын 4-нд Дөргөн сумын нутгийн хоёр залуу алттай газар байна гээд тараачихаж. Гэтэл маргааш нь Дөргөн суманд 80 гаруй машин хэдэн зуун хүн цугласан гэсэн. Хамгийн гол нь алт олдсон газар нь Хар ус нуурын хажууд байгалийн тусгай хамгаалалттай газар нутагт хамаарагддаг газар. Тиймээс газар нутгаа хамгаалахаар тус сумын иргэд аймагт мэдэгдсэнээр манай газраас хамгаалалт гаргаж ажилласан. Түүнчлэн хүмүүсийн ярьж, сонин хэвлэл дээр бичээд байгаа шиг хамгаалалтад ажиллаж байсан цагдаа нар өөрсдөө болон ах дүү хамаатан садангаа оруулж байсан зүйл байхгүй гэдгийг хэлмээр байна. Би дээрх байдал үүсгэхгүйн тулд давхар хяналт хийлгэхээр хэв журмын албаны даргаа явуулсан. Тэр байтугай нутгийн 200 гаруй иргэд цуглачихаад цагдаа нар руу дайрсан явдал гарсан. Тиймээс бид нутгийн иргэдийн төлөөлөл болгож таван хүнийг хамгаалалтад авсан газарт оруулж байгаа байдалтай танилцуулсан.

-Буудна хэмээн айлган сүрдүүлж, гал нээсэн тохиолдол гарсан гэсэн?
-Газарзүйн байрлалын хувьд Говь-Алтай, Баянхонгор, Завхан, Увс гэх аймгуудтай ойр байдаг учраас дээрх аймгуудаас их хүмүүс ирсэн байсан. Гэтэл эдгээр хүмүүс манай албан хаагчид руу шөнөөөр дайрч чулуу шидэж дайрсан. Энэ үед манай албан хаагчид авах ёстой арга хэмжээ буюу хий буудаж сануулга өгсөн. Гэхдээ тэд дахиад л дайрсан. Иймээс албан хаагчдынхаа аюулгүй байдлыг хангах үүднээс хамгаалалтад гарч байсан цагдаагийн албан хаагчдаа татан буулгасан.

Дорноговь аймгийн цагдаагийн газрын дарга, дэд хурандаа Л.Нямжав

-Танай аймагт зонхилон гарч байгаа гэмт хэрэг гэх юм бол?
-Манай аймагт зам тээврийн осол их гарч байна. Хөдөлгөөний аюулгүй байдлын эсрэг гэмт хэрэг хулгай дээрэм танхайн хэрэг их байгаа. Мөн байгаль орчны эсрэг гэмт хэрэг сүүлийн үед ихсэх хандлагатай байгааг нь харагдсан.

-Дорноговь аймгийн хувьд хилийн цэрэгтэй холбоотой гэмт хэрэг их гардаг. Энэ бараг хэвийн үзэгдэл болчихсон юм шиг байдаг. Энэ талаар?
-Хилийн цэрэгтэй холбоотой гарч байгаа хэрэг нь тухайн анги хилийн отрядь удирдах албан тушаалтнуудын хариуцлага зохион байгуулалтын ажил. Цэрэгт явж алба хааж байгаа хүмүүсийн сэтгэл зүйн асуудал их анхаарах хэрэгтэй. Энэ тал дээр сургалт арга хэмжээг зохион байгуулах хэрэгтэй гэдэг нь харагдаж байна. Ингэснээр хилийн цэрэгтэй холбоотой гарах гэмт хэргүүдийг бууруулах болно.

-Малын хулгайн гэмт хэрэг нэлээдгүй гардаг аймгуудын тоонд Дорноговь ордог. Энэ тал дээр ямар арга хэмжээ авч ажиллаж байна вэ?
-Манай аймагт мал хулгайлах гэмт хэргийн гаралт их байгаа. Энэ төрлийн гэмт хэргийг бууруулахын тулд цагдаагийн байгууллагын үйл ажиллагааг нээлттэй ил тод болгох шаардлагатай байна. Мөн иргэдийн сайн дурын оролцоог нэмэгдүүлж, тогтмол харилцаа холбоотой ажиллавал мал хулгайлах гэмт хэргийн гаралт буурна гэж үзэж байна.

Г.Түмэнтогос