Боловсролын салбарын цомхотголтой холбоотой мэдээлэл цахим сүлжээнд түгэв. Үүнтэй холбогдуулан Боловсролын яамнаас албан ёсны тайлбар, мэдээлэл өглөө. 

Боловсролын сайдын зөвлөх Д.Гантулга “Боловсролын салбарт 94,000 орчим багш, ажилтан, албан хаагч ажилладаг. Үүнээс 48,000 орчим нь багш. Багш нарыг цомхотгох, халах ойлголт огт байхгүй. Халах нь бүү хэл, улсын хэмжээнд 3000 орчим багш дутагдалтай байна.

Харин боловсролын салбарын албан хаагчдын 9 хувийг цомхтгоно гэх асуудал яригдсан. Өөрөөр хэлбэл, багшаас бусад албан хаагчийн тухай асуудал гэсэн үг. Нийт 48 мянга орчим багшийг хасаад үлдсэн албан хаагчдын 9 хувь гэхээр 4000 орчим хүн болж буй юм. Энэ 4000 гэсэн тоон дотор 2000 орчим сул тоог оруулж байгаа юм. Үүнийг тайлбарлавал, хүүхдийн тоо өсөхөөр албан тушаалын тоо нэмэгддэг. Энэ нэмэгдэх орон тоог цомхотголд оруулахгүй яаж авч үлдэх вэ гэдэгт бид ажиллаж байна. 

Цомхотголд боловсролын удирдлагын байгууллага, Боловсролын яам болон түүний харьяа байгууллагуудыг хамруулна. Ингэхийн тулд чиг үүргийн давхцалд дүн шинжилгээ хийсэн. Тухайлбал, манай яам 10 газартай байсан бол одоо 6 болж байгаа. Хууль ёсны дагуу өнөөдөр ажлаа хийж буй нэг ч хүн халагдахгүй” гэв.