Гаалийн баталгаат агуулахын зөвшөөрлийг 15 дарга дамжиж, 1035 өдрийн дараа олгодог байдлыг 9-р сарын 30-ны дотор цэгцлэх үүргийг өглөө.

Тодруулбал, Эдийн засаг, хөгжлийн сайд Н.Учрал хэлэхдээ, "Гаалийн баталгаат агуулахын зөвшөөрөл 15 хүртэл албан тушаалтнаар дамжиж энэ зөвшөөрөл олгож байна. Тэгээд өдөр нь 4 цагт хаагаад явчихдаг.

Хоног өдөр өнгөрөх тусам тэр баталгаат агуулахынхаа төлбөрийг төлдөг. Зүгээр л байлгаад байдаг. Өөрөөр хэлбэл хувийн хэвшлийг дарамтлахын төлөө л байгаа юм.

Мөн гаалийн байцаагчийн ажиллах хуваариас шалтгаалаад бараа татан авах хугацаа тодорхойгүй байгаад байна. Стандарт алдагдаж байна гэсэн үг. 

Янз бүрийн мууддаг бараа бүтээгдэхүүнийг удаагаад байхаар стандартын шаардлага хангахгүй, эрсдэлд ороод байна. Гаалийн баталгаат агуулахад бараа бүтээгдэхүүн хадгалсаар байтал өмхийрч байна.

Ийм байдлыг яах вэ? Үүнд миний ухаан хүрэхгүй юм байна. 

Гаалийн баталгаат агуулахын зөвшөөрлийг хувийн хэвшлүүдэд олгож шат дамжлагыг нь цөөрүүлэх шалгуур үзүүлэлтүүдийг шинэчил ээ. Импортын гэрээг үе шаттайгаар бүртгэлжүүлж гаалийн хяналт шалгалтыг бууруулахыг Сангийн яам, Татварын ерөнхий газар, ГЕГ-т би даалгаж байна. Энэ асуудлыг одоо шийд.

Тэгээд импортынхоо бүх гэрээг бүртгэлжүүлээд импортлогчийн татвар нуух эрсдэлийг нь бууруулаад байцаагчийн оролцоогоо багасга. Ингэснээр зардал чинь багасна" гэлээ.