Татвар, даатгалаа төлөөгүй, оношилгоонд автомашинаа хамруулаагүй, торгуулиа төлөөгүй жолоочийг хөдөлгөөнд оролцуулахгүй, автомашиныг нь журамлах талаар хуулийн байгууллагаас мэдээлээд буй.

Энэ талаар Хотын дарга Х.Нямбаатар “Татвар, торгуулиа төлөөгүй автомашиныг цэгцлэхээр Нийслэлийн цагдаагийн албанаас тодорхой ажил хийж журамлаж байгаа. Гэвч хөдөлгөөний эрчим улам л нэмэгдээд байна. Ухаалаг камерын системийг 12 дугаар сарын 25-наас ашиглалтад оруулна. Би ХЗДХ-ийн сайдаар ажиллаж байхдаа үүнийг эхлүүлсэн, Хотын дарга байхдаа аваад очсон. Программ, техник хангамж, 7 дэд төв байгуулсан. Одоо туршилтыг эхлүүлнэ.

Их өгөгдлийн системээс зөрчилтэй автомашины бүх мэдээллийг  цагдаагийн эрх бүхий ажилтны гар утсандаа татсан апликейшнд илгээнэ. Ингээд цагдаа татвар, даатгал, зогсоолын төлбөрөө төлөөгүй зэрэг зөрчилтэй байвал тухайн тээврийн хэрэгслийг журамлана. Энэ систем хиймэл оюун ухаанаар зөрчлийг илрүүлээд торгууль илгээдэг болж буй. Үүнтэй холбоотой хууль эрхзүйн шинэчлэлийг ирэх 7 хоногийн Засгийн газрын хуралдаанд оруулж хэлэлцэнэ.

Зөрчлийн тухай хууль, Зөрчил шалган шийдвэрлэх тухай хуулийг би батлуулж байсан. Үүнд зөрчил шалган шийдвэрлэх эрх бүхий албан тушаалтны жагсаалт бий. Үүнд AI  ороогүй. Одоо бид хиймэл оюун ухаан зөрчлийг илрүүлээд, шийтгэл ногдуулна гэдэг зохицуулалтыг Зөрчлийн хууль, Зөрчил шалган шийдвэрлэх тухай хуульд оруулаад төслөө боловсруулсан” гэлээ.