Өнөөдөр Олон улсын охидын эрхийг хамгаалах өдөр. Энэ өдрийн хүрээнд хуульч Р.Булгамаа ТББ-уудтай хамтран охидын эрхийг хамгаалах асуудлаар мэдээлэл хийлээ. 

Хуульч Р.Булгамаа “Сүүлийн жилүүдэд Монгол Улсад үйлдэгдэж байгаа гэмт хэргүүдийн дунд хүүхэд гэмт хэргийн хохирогч болох тохиолдол маш олон болсон. Ялангуяа охидын эсрэг үйлдэгдэж байгаа хэргүүд, тэр дундаа бэлгийн халдашгүй байдлын эсрэг гэмт хэрэг газар авч байна. 

Өдрөөс өдөрт аймшигтай гэмт хэргүүд дараалан гарах боллоо. Ноцтой гэмт хэрэг гарах бүрд бүх нийтээрээ шуугиад л хэсэг хугацааны дараа мартчихдаг нь нийтлэг болж буйд цэг тавих цаг болсон. Энэ гэмт хэргээс урьдчилан сэргийлэхэд төрийн болон мэргэжлийн байгууллагууд оновчтой шийдэл гаргаж чадахгүй байгаад харамсаж байна.

Хохирогч болсон охидын сэтгэл зүйг эмчлэх, нийгэмших, нэр төрөө хамгаалахад нь чиглэсэн оновчтой төрийн бодлого яаралтай шаардлагатай байна" гэлээ. 

• 2017 онд 138
• 2018 онд 309
• 2019 онд 350
• 2020 онд 328
• 2021 оны эхний найман сарын байдлаар 228 охин бэлгийн хүчирхийллийн хохирогч болжээ. 

Хуульч Р.Булгамаа Эрүүгийн хуулийн заалтыг Хүүхдийн эрхийн тухай хууль, Хүүхэд хамгааллын тухай хуульд нийцүүлж, ялын бодлогыг эргэн харах шаардлагатай байна гэлээ. 

Тэрээр ялын бодлогыг зөөлөн байлгаад байгаа УИХ-ын гишүүдээсээ ичиж байна, хүүхдээ хайрлах төрийн бодлого алга." гэв. Тиймээс Эрүүгийн хуульд нэмэлт өөрчлөлт оруулж ял завших боломж олгоод байгаа хуулийн заалтуудыг хүчингүй болгохыг УИХ-ын гишүүдээс хүслээ.

Түүнчлэн "Хүчирхийллийн асуудал хүүхдээр ч хязгаарлагдахгүй охид, бүсгүйчүүдийн эрх ч өнөөдөр яригдах учиртай. Эрүүгийн хуульд "Бэлгийн дарамт учруулах" гэдэг зүйл заалт 2015 онд орсон ч 2017 оны парламент бэлгийн дарамт учруулах гэх заалтыг хассан. Тиймээс энэ өдөр мөн эрүүгийн хуульд байсан "Бэлгийн дарамт учруулах" гэсэн зүйл заалтыг сэргээхийг УИХ-ын гишүүдээс хүсэж байна гэв.

Мөн бэлгийн хүчирхийллийн гэмт хэргийг шалгадаг стандарт бий болгож, хэргийг мэргэшсэн прокурорууд хянадаг тогтолцоог бий болгомоор байна гэлээ.