Цахим сүлжээнд “Жолоочийн албан журмын даатгал 700 мянган төгрөг болсон” гэдэг мэдээлэл түгээд байна.

Энэ ор үндэслэлгүй худал мэдээлэл биш. Хэрэв жолооч даатгалын гэрээ хийсэн нэг жилийн хугацаанд согтуугаар тээврийн хэрэгсэл жолоодсон, урсгал сөрсөн зэргээр Монгол Улсын замын хөдөлгөөний дүрэм зөрчсөн. Мөн банк бус санхүүгийн байгууллагын зээлээр автомашин худалдан авсан, улмаар тухайн тээврийн хэрэгслийг жолоодох хүний тоог “хязгааргүй”-ээр сонгосон зэрэг болон бусад тохиолдолд албан журмын даатгалын хувь хэмжээ 700 мянган төгрөгт хүрч болох аж. Гэхдээ эдгээр тохиолдол бүрд заавал 700 мянган төгрөгийн даатгалд хамрагдах ёстой гэдэг ойлголт үгүйг тодотгоё.

Бусдаар жолооч бүр даатгалд 700 мянган төгрөг төлөх нөхцөл үүсээгүйг Албан журмын даатгагчдын холбооноос тайлбарлалаа.

Албан журмын даатгалын өнөөгийн үндсэн суурь хураамж:

• А ангилал: 12500 төгрөг
• В ангилал: 33000 төгрөг
• С ангилал: 42500 төгрөг
• D ангилал: 53000 төгрөг
• E ангилал: 12500 төгрөг байна.

Хэрэв та хариуцлагатай, сайн жолооч бол дээрх мөнгөн дүнд огцом өөрчлөлт гарахгүй аж. Харин замын хөдөлгөөний дүрэмж зөрчсөн, осол гаргасан зэрэг тохиолдолд 0.4 хувиар нэмэгдэх шинэчилсэн журам 2025 оны нэгдүгээр сарын 1-нээс мөрдөгдөж эхлээд байна.  Дэлгэрэнгүй мэдээллийг тун удахгүй эргэн хүргэнэ.