Улсын Ерөнхийн прокурорын газраас энэ сарын 05-ны өдөр "нүүрсний" гэх тодотголтой хэрэгт мөрдөн шалгах ажиллагааг мөрдөх чиг үүрэг бүхий байгууллагууд хамтран явуулах тухай тогтоол гаргасан.

Үүний дагуу Авлигатай тэмцэх газар, Тагнуулын ерөнхий газар, Цагдаагийн ерөнхий газрын дарга нарын 2022 оны 12 дугаар сарын 06-ны өдрийн хамтарсан тушаал гарав. Уг тушаалаар нүүрс олборлолт, экспорт, боомтын нүүрсний тээвэрлэлт, төлбөртэй холбогдох эрүүгийн хэрэгт мөрдөн шалгах ажиллагааг түргэн шуурхай явуулах зорилгоор ажлын хэсгийг байгуулжээ.

Тус ажлын хэсэг өнөөдрөөс Өмнөговь аймагт мөрдөн шалгах ажиллагааг явуулж эхэлсэн бөгөөд шалгалтын явцын талаар

АТГ-ын дэд дарга, эрхэлсэн комиссар Г.Азжаргал, Мөрдөн шалгах хэлтсийн дарга Х.Буянтүмэн, Мөрдөн шалгах хэлтсийн албаны дарга М.Даваатогтох, Гүйцэтгэх ажлын хэлтсийн нэгдүгээр орлогч Р.Лхагвасүрэн нар мэдээлэл хийж байна.

АТГ-ын дэд дарга, эрхэлсэн комиссар Г.Азжаргал:

-Төрийн өмчит компаниудыг олон нийтийн хяналттай болгох ёстой. Төрийн өмчит гэдэг нэрийн цаана улстөрийн намын санхүүжилт, хулгай дээрэм, томилгоо, шахаа хэрээс хэтэрч байна. 2.3 их наяд төгрөг эргэн төлөгдөж байна гэдэг нэг талдаа сайн ч, нөгөө талдаа реформ шаардлагатайг харуулж байна.

Мөрдөн шалгах хэлтсийн албаны дарга, ахлах комиссар М.Даваатогтох:

-Нийт 22 хэрэгт мөрдөн шалгах ажиллагаа явуулж байна. Мөрдөн шалгах ажиллагааны явцад одоогоор нийт 47 объектод нэгжлэг явуулсан. Дараах хүмүүсийг нүүрстэй холбоотой ажиллагаанд шууд болон шууд бусаар холбогдуулан шалгах үндэслэл байгаа. Үүнд:

• Ерөнхийлөгч асан Х.Баттулга
• Ерөнхийлөгчийн Тамгын газрын даргаар ажиллаж байсан Ө.Шижир
• Зам тээврийн хөгжлийн сайд асан Д.Ганбат
• УИХ-ын гишүүн А.Адъяасүрэн
• УИХ-ын гишүүн Д.Бат-Эрдэнэ
• УИХ-ын гишүүн А.Анандбазар
• ЕТГ-ын даргаар ажиллаж байсан З.Энхболд
• УИХ-ын гишүүн Н.Наранбаатар
• УИХ-ын гишүүн Б.Баттөмөр
• УИХ-ын гишүүн Ц.Сэргэлэн
• УИХ-ын гишүүн Ш.Раднаасэд
• Өмнөговь аймгийн Засаг дарга Р.Сэддорж
• Өмнөговь аймгийн ИТХ-ын төлөөлөгч Б.Эрдэнэ-Очир
• Өмнөговь аймгийн Засаг дарга асан Б.Бадраа
• "Эрдэнэс тавантолгой" ХК-ийн гүйцэтгэх захирлаар ажиллаж байсан А.Ариунболд
• "Эрдэнэс тавантолгой" ХК-ийн гүйцэтгэх захирлаар ажиллаж байсан Б.Ганхуяг
• "Эрхэт Монгол" группийн үүсгэн байгуулагч Х.Мандахбаяр.

Эдгээр нэр дурдагдсан 17 хүний заримаас мэдүүлэг авсан. Шаардлагатай хүмүүст хилийн хориг тавьсан. Ерөнхийлөгч асан Х.Баттулгад хилийн хориг тавиагүй. Бид энэ нэрсийг тодорхой баримтад үндэслэн танилцуулж байна. Түүнээс хэн нэгний нөлөөнд автсан зүйл байхгүй.

АТГ 50 мөрдөгчтэй. Улс орныг хамарсан том хэрэгт манай мөрдөгчид нүдээ гархилтал ажиллаж байгаа. Олон нийт минь хүн хүчийг тооцоолж, дэмжлэг үзүүлээрэй гэж хүсэж байна.