Хүн худалдаалах гэмт хэрэгт хүүхэд өртөхөөс урьдчилан сэргийлэх “Мэддэг мэдээлдэг байя” аян үргэлжилж байна. Энэхүү аяныг АНУ-ын Төрийн департаментын санхүүжилтээр ХЗДХЯ, ХНХЯ, Дэлхийн зөн Монгол олон улсын байгууллага, Азийн сан, “Монгол Контент” ХХК хамтран хэрэгжүүлж байгаа билээ.

Мөн аяны дэмжигчээр “Сэнтрал Экспресс Си Ви Эс” ХК ажиллаж байна. Аяны дэмжигч болон зохион байгуулагчдын зүгээс хүн худалдаалах гэмт хэрэг, хүүхдийн хөдөлмөр эрхлэлт, бэлгийн мөлжлөгийн талаарх мэдээлэл бүхий QR хуудсыг CU сүлжээ дэлгүүрийн 340 салбарт байршууллаа.

Тус QR бүхий зурагт хуудсыг CU дэлгүүрүүдийн хоолны ширээнд наасан бөгөөд та бүхэн тус дэлгүүрээр үйлчлүүлэхдээ QR-ийг уншуулж, хүн худалдаалах гэмт хэргийн талаарх өөрийн мэдлэгээ сонжиж, мэдээлэл авах боломжтой.

Хүн худалдаалах гэмт хэрэг аль ч улсад үйлдэгдэх боломжтой бөгөөд Монгол Улс илгээгч, дамжуулагч, хүлээн авагч орон гэдгээр олон улсын тайлан, илтгэлд дурдагдаж байна. Уг гэмт хэргийн дийлэнх тохиолдол бэлгийн мөлжлөг болон албадан хөдөлмөр эрхлүүлэх, хөдөлмөрийн мөлжлөгийн хэлбэрээр үйлдэгддэг ба хүүхэд, эрчүүд ч өртдөг.

Иймд эрсдэлтэй тохиолдлыг мэдээлдэг, эрсдэл өндөр хүүхэд, хохирогчийг илрүүлэх, тэднийг үйлчилгээ үзүүлэгч байгууллагад хандуулах, хамгаалах хандлагыг түгээн дэлгэрүүлэх зорилгоор “Мэддэг, мэдээлдэг байя” аяныг эхлүүлсэн бөгөөд хүүхдүүд, эцэг эх асран хамгаалагч нарт контентоор дамжуулан мэдээллийг хүргэж байна.