Улсын хэмжээнд өнөөдөр /2025.06.28/ 11:00 цагийн байдлаар ой, хээрийн 14 түймэртэй байгаагаас 5 цурманд, 9 түймрийг унтраах ажиллагаа үргэлжилж байна.

Нөхцөл байдлыг талаар УОК-ын нарийн бичгийн дарга, хурандаа Т.Баярхүү мэдээллээ. Тэрээр, "Өнөөдрийн байдлаар, сүүлийн 72 цагийн хугацаанд нийт 17 удаагийн ой, хээрийн түймэр бүртгэгдсэн. Үүнээс:

• Сэлэнгэ аймаг -12 удаа
• Булган аймаг - 2 удаа
• Дорнод, Дархан-Уул, Хэнтий аймаг - тус бүр 1 удаа

Эдгээрээс:

• 7 түймэр бүрэн унтарсан
• 3 түймэр цурманд орсон
• 7 түймрийн унтраах ажиллагаа үргэлжилж байна

Сэлэнгэ аймагт бүртгэгдсэн 12 түймрийн байршлууд:

• Алтанбулаг сум - 5
• Хүдэр сум - 4
• Ерөө сум - 2
• Цагааннуур сум - 1

2025 оны 6-р сарын 25-ны байдлаар Сэлэнгэ аймагт нийт 30 удаагийн түймэр бүртгэгдэж байсан бол өнөөдрийн байдлаар энэ тоо 41-д хүрсэн.

Сүүлийн 72 цагт Сэлэнгэд 11 шинэ түймэр гарсан байна.

Унтрааж, хүлээлгэн өгсөн 6 голомт:

• Хүдэр сумын Жаргалантын ам (Сэлэнгэ)
• Цагааннуур сум (Хөвсгөл)
• Тэшиг сум (Булган)
• Хонгор сум (Дархан-Уул)
• Цагааннуур сум (Сэлэнгэ) зэрэг газрууд

Цурманд оруулсан 4 түймэр:

• Улаануул (Хөвсгөл)
• Бугат (Булган)
• Алтанбулаг сумын "Гурван цагаан толгой", "Орос даваа" орчмоор (Сэлэнгэ)

Нийт 9 түймэрт унтраах ажиллагаа явуулж буй. Энэ нь Сэлэнгэ аймгийн Ерөө, Хүдэр, Алтанбулаг, Хэнтий аймгийн Батширээт сумдад.

Онцгой байдлын байгууллагаас шаардлагатай хүн хүчийг дайчилж, газар дээр нь ажиллаж байна.

Түймрийн эрчмийн нөхцөл байдал:

6-р сарын 27-ны орой Алтанбулаг суманд гарсан түймрийн үед салхины хурд 19-20 м/с хүрснээс баруун хэсэгт хяналтаас гарч, зүүн тийш тархах хандлага илэрсэн. Шөнө 3–5 цагийн хооронд бага зэргийн бороо орсон ч унтраах ажиллагаанд хангалттай нөлөө үзүүлээгүй.

Хүнд машин механизм ашиглаж буй байдал:

• Газар тариалангийн ААН-уудын техник, трактор
• Бульдозероор тархалтыг хязгаарлах зогоон зурвас татах ажиллагаа явагдаж байна

Одоогоор ажиллаж байгаа албан хаагчдын тоо (зарим голомтуудаар):

• Асгатын ам (Ерөө, Сэлэнгэ) -32
• Шарлангийн гол (Ерөө) -73
• Дурган Сухайт (Алтанбулаг, Сэлэнгэ) - 141
• Сөдтойн даваа (Хүдэр) - 11
• Шоргоолжны даваа, өндөр, худгийн гуу гэх зэрэг газруудад нийт 100 гаруй алба хаагч

Агаараас аврах ажиллагаа:

• Зэвсэгт хүчний 303-р анги, ОБЕГ-ын 111-р ангийн нисдэг тэрэг ашиглан хүн, техник тээвэрлэж байна
• Автомашин хүрэх боломжгүй бүсэд нисдэг тэргээр алба хаагчдыг буулгаж байгаа

Удирдлагын зүгээс:

• ОБЕГ-ын дарга, хошууч генерал Г.Ариунбуян
• ОБЕГ-ын Гал түймэртэй тэмцэх газрын дарга, хурандаа Ц.Нямбаяр нар газар дээр нь удирдлага зохицуулалтыг хариуцан ажиллаж байна
• ОБЕГ дээр Шуурхай штаб байгуулагдаж, ажиллагааг төлөвлөж хэрэгжүүлж буй. 

Архангай, Хөвсгөл, Завханы баруун хэсгээр хүчтэй бороо, аянга, салхи, үерийн эрсдэлтэй тул иргэд, малчид, аялагчдад болзошгүй аюулаас сэргийлэхийг анхааруулж байна" гэлээ.