Нийслэлийн Сүхбаатар дүүргийн 3 дугаар хорооны нутаг дэвсгэрт, “Канте” нэртэй шөнийн цэнгээний газрын гадна энэ сарын 19-ний шөнө Э.Тэмүүлэн, Ц.Санжаачойпэл, Л.Алтан-Очир, Б.Амарсайхан нар нь хохирогч Д.С-ийн биед халдсан.

Улмаар эрүүл мэндэд нь хохирол учруулсан хэрэгт Сүхбаатар дүүргийн Цагдаагийн газрын нэгдүгээр хэлтсээс Эрүүгийн хуулийн тусгай ангийн 20.16 дугаар зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татах санал ирүүлснийг прокурор үндэслэлтэй гэж үзэн  яллагдагчаар татаад байгаа.

Одоогоор Э.Тэмүүлэн, Ц.Санжаачойпэл, Л.Алтан-Очир нарыг цагдан хориод байгаа бол Б.Амарсайхан гадаад улсад зорчсон гэх мэдээлэл бий. Тэгвэл яллагдагчаар татагдаад буй Б.Амарсайханыг Интерполын хөх булангаар зарлуулах хүсэлтийг илгээжээ.

Интерпол гэмт хэргийг таслан зогсоох, дэлхийн улс орнуудын цагдаагийн байгууллагуудын хамтын ажиллагааг хөгжүүлэх зорилготой олон улсын байгууллага. Тус байгууллагын www.interpol.int сайтад Монгол Улсын иргэн Б.Амарсайханыг эрэн сурвалжилж байгаа тухай мэдээлэл одоогоор нийтлэгдээгүй байна. 

Оргон зайлж, сураггүй болсон болон мөрдөн шалгах ажиллагаанд биечлэн мэдүүлэг, тайлбар өгөх мэдээллийг өөрт нь хүргүүлж, зарлан дуудсан ч ирээгүй иргэдийг Интерполоор эрэн сурвалжлах хууль зүйн үндэслэлтэй. Харин Интерполын хөх булан зар (Blue Notice) нь тодорхой гэмт хэрэгт сэжиглэгдэж буй хүний байршил, үйл хөдлөл, хэн болох, хаана очсон гэх мэт мэдээллийг хянаж бүртгэх, тогтоох зорилготой.