Монгол Улс НҮБ-аас туслалцаа дэмжлэг авахаас гадна дэлхийн дулаарал, уур амьсгалын өөрчлөлтийг сааруулахад хувь нэмэр оруулагч, санаачлагч орны нэг гэдгийг илтгэх хоёр том үйл явдал ирэх онд  Монгол Улсад өрнөхийг салбарынхан мэдээлж байна.

Нэг нь НҮБ-ын Цөлжилттэй тэмцэх конвенцын Талуудын 17 дугаар бага хуралдаан буюу СОР17, нөгөөх нь Монгол Улсын санаачлан НҮБ-ын тэмдэглэлт жил болгон батлуулж чадсан  “Бэлчээр, нүүдлийн мал аж ахуй эрхлэгчдийн Олон Улсын жил” ийн томоохон арга хэмжээ юм. Үүнийг дагаад томоохон сорилтууд бий болох бөгөөд түүнийг даван туулж байж үр дүнд хүрэхийг ч Монгол Улс дахь НҮБ-ын суурин зохицуулагч Ян ван Хиердэн өнөөдөр болсон “Бэлчээрийн мал аж ахуй ба Монгол Улс” хэлэлцүүлгийн үеэр хэлж байлаа.

НҮБ-ын Ерөнхий Ассамблейн 76 дугаар чуулган 2022 онд Бүгд хуралдаанаараа Монгол Улсын санаачилсан “Олон улсын  бэлчээр ба нүүдлийн мал аж ахуй эрхлэгчдийн жилийг ирэх 2026 онд тэмдэглэн өнгөрүүлэх тухай” (International Year of Rangelands and Pastoralists, 2026) санаачилгыг хэлэлцэж, гишүүн улсууд санал нэгтэй баталсан.

Дэлхийн нийт газар нутгийн талаас илүү хувийг эзлэх бэлчээр нутагт өнөөдрийн байдлаар 200 гаруй сая хүн мал аж ахуй эрхлэн амьдарч байна.

Эдийн засаг, хүн амын амжиргаанд чухал үүрэг гүйцэтгэж буй мал аж ахуй, түүнийг эрхлэгчдийн үүрэг, хувь нэмрийг дэлхий нийтэд сурталчлах, үнэлэмжийг өсгөх, дэлхийн хүнсний аюулгүй байдлыг хангах, экосистемийн үр ашгийг хүртэхэд бэлчээрийн хувь нэмрийг таниулах, бэлчээрийн тогтвортой менежмент, нөхөн сэргээлтийг хэрэгжүүлэх, энэ чиглэлд хөрөнгө оруулалт нэмэгдүүлэхэд тухайн жилийн ач холбогдол оршиж байна.

НҮБ-ын 80 жилийн ойн хүрээнд өнөөдөр болсон “Бэлчээрийн мал аж ахуй ба Монгол Улс” хэлэлцүүлгийн нэг сэдэв нь энэ байлаа.

Гадаад харилцааны яамны Гадаад худалдаа, эдийн засгийн зөвлөх В.Энхболд илтгэлдээ “Бэлчээр, нүүдлийн мал аж ахуй эрхлэгчдийн олон улсын жилийг ой, баяр байдлаар биш ажил хэрэгч, шийдэлд хүрэх байдлаар тэмдэглэх ёстойг хэлээд НҮБ-ын ХХААБ-ын дэргэд “Олон улсын бэлчээр ба нүүдлийн мал аж ахуй эрхлэгчдийн жил” ийг хариуцсан Удирдах хороо байгуулагдаж даргаар нь Монгол Улс сонгогдон ажиллаж байгааг дуулгалаа. 2026 онд манай улсад зочилж бэлчээрийн мал аж ахуйтай танилцах санал олон улс орноос ирж байгаа гэв.

“Олон улсын бэлчээр ба нүүдлийн мал аж ахуй эрхлэгчдийн жил” нь Монгол Улс ОУ-ын түвшинд хамтын ажиллагаа өрнүүлэх, дотооддоо бүх талууд хамтран ажиллах, малчид, хөдөөгийн иргэд, ОН-ийн байгууллагад үр өгөөжтэй дэмжлэг үзүүлэх арга зам, эх үүсвэрийг шийдэх чухал цаг үе болохыг ГХЯ, ХХААХҮЯ болон бусад талууд онцлон тэмдэглэсэн юм.

Мөн өнөөдрийн хэлэлцүүлэгт ХХААХҮЯ, НҮБ-ын Хүнс, хөдөө аж ахуйн байгууллага, Газар зохион байгуулалт, геодези, зураг зүйн ерөнхий газар болон орон нутгийн төлөөллүүд оролцож, “Монгол Улсын газар ашиглалтын бодлогын шинэчлэл”, “Бэлчээрийн фото мониторингийн үр дүнгийн хэрэглээ, ач холбогдол” зэрэг сэдвээр илтгэл тавьж  хэлэлцүүллээ.

Монгол Улсын нийт бэлчээр 85 сая хонин толгой малын даацтай ч өнөөдөр 50 гаруй сая хонин толгойгоор хэтэрчээ.

“Манай улсын малын тоо толгой бизнесийн өсөлтөөсөө илүү хурдан байна. Гэхдээ малын тоог хүчээр хязгаарлах бус өсөж буй тоо толгойтой тэнцэхүйц хэмжээгээр зах зээлийн эргэлтэд оруулах зэрэг арга бий гэж ХХААХҮЯ үзэж байна.

Эх сурвалж "Тогтвортой хөгжлийн төлөө" сэтгүүлчдийн клуб.  Хуулбарлан авч нийтлэх, түгээх, хэсэгчлэн авч ашиглах боломжтой.

Эх сурвалж: Тогтвортой хөгжлийн төлөө сэтгүүлчид клуб