“Монгол контент” ХХК нь GoGo.mn мэдээний сайтыг эрхлэн гаргадаг бөгөөд сүүлийн 18 жил тасралтгүй үйл ажиллагаа явуулж байна. Гэтэл манай мэдээний сайтын нэр, логог дуурайлган ашигласан луйвар хийх зорилготой байж болзошгүй, сэжигтэй нийтлэл цахим сүлжээнд тархсан байна.

Тодруулбал, 2025 оны 07 дугаар сарын 30-ны өдөр манай сайтыг хуурамчаар дуурайн үйлдэж, С.Зориг агсны нэр, зургийг ашигласан хуурамч мэдээ нийтэлж цацсан байна. Хэдийгээр нийтлэлийн гарчиг нь “Санжаасүрэнгийн Зоригийн аллагын нуугдмал үнэн: Түүнийг яагаад үнэхээр алсан бэ” гэж байгаа боловч доторх агуулга нь “Эхлэлийн 600,000 төгрөгөөр хөрөнгө оруулалт хийгээд сард 8-10 сая төгрөгийн орлоготой болоорой” гэх утга бүхий луйврын шинжтэй нийтлэл байгаа юм.

GoGo.mn-н лого, бусад хэсэгт дарж нэвтрэхэд “ZORIG CAPITAL – ЭТО НЕ ПРОСТО ИНВЕСТИЦИЯ. ЭТО НАСЛЕДИЕ, КОТОРОЕ НУЖНО ЗАЩИЩАТЬ.” гэсэн нүүр гарч ирж байгаа зэрэг нь манай сайтын нэр, логог дуурайлган, цахим залилан хийж байх магадлалтайг харуулж байна. 

Уг мэдээллийг Zorig Capital (https://www.facebook.com/profile.php?id=100078985064094) гэх пэйжээр түгээж байгаа бөгөөд уг платформыг бүхэлдээ өгөгдөлд тулгуурлан, Зориг сангаас бүрэн дэмждэг гэх тайлбарыг оруулсныг Зориг сан мөн үгүйсгээд байгаа болно. 

Иймд доорх нийтлэлийг нэн яаралтай устгуулж, буруутай этгээдийг олж илрүүлэх, түүнчлэн холбогдох хуулийн дагуу хариуцлага тооцуулахаар цагдаагийн байгууллагад хандаад байна.

Иргэд, олон нийт, манай сайтын уншигч, хэрэглэгч та бүхэн учирч болзошгүй эрсдэлээс урьдчилан сэргийлж дээрх сэжигтэй холбоос дээр дарж, нэвтрэхгүй байхыг GoGo.mn мэдээллийн сайтын редакц болон “Монгол Контент” ХХК-ийн зүгээс анхааруулж байна. 

Мөн та бүхэн цахим орчинд түгээсэн сэжигтэй холбоосыг шалгах аргатай ЭНД-ээс танилцах боломжтой.