“Монгол Улс дахь гамшгийн эрсдэлийг бууруулах олон нийтийн тогтвортой үйл ажиллагаа, боловсрол төсөл”-ийг 2025-2027 онд Япон Улсын Токайн үндэсний дээд боловсролын систем болон Нагоя их сургууль хэрэгжүүлэх бөгөөд Онцгой байдлын ерөнхий газар (ОБЕГ), Боловсролын яам, Монгол Улсын Их Сургууль (МУИС), Шинжлэх ухааны академи (ШУА)-тай хамтран ажиллаж байна.

Үүнтэй холбогдуулан ОБЕГ-ын дэд дарга, хурандаа Ц.Уранчимэг төслийн багийн гишүүд болох Нагоя их сургуулийн профессор Ясухиро Сузуки, Нагоя их сургуулийн профессор Шоко Иши, МУИС-ийн ШУС-ийн Хүмүүнлэгийн ухааны салбарын Ази судлалын тэнхимийн профессор С.Баттулга нарын төлөөлөгчдийг хүлээн авч уулзлаа.

Төслийн хүрээнд Орхон, Өмнөговь, Дорнод, Ховд аймаг болон Улаанбаатар хотыг зорилтот бүс болгон сонгож, 50 сайн дурынхан, 100 багшийг чадавхжуулах, улмаар бүсийн хэмжээнд 2.185.000 иргэнд чиглэсэн гамшгийн боловсрол, эрсдэлийн мэдээллийн хүртээмжийг нэмэгдүүлэх арга хэмжээг зохион байгуулах юм. 

Төслийг  гамшгийн эрсдэлийг бууруулах “Боосай карт”-ыг хамтран бүтээж, практикт нэвтрүүлэх, сайн дурынхны тогтолцоог бэхжүүлж, иргэдийн идэвх оролцоо, мэдлэг мэдээллийг дээшлүүлэх, аюулгүй байдлын соёлыг төлөвшүүлэх зорилгоор хэрэгжүүлж байна.

Энэ хүрээнд:

• Сайн дурынхныг идэвхжүүлэх: Орон нутгийн түвшинд төлөвлөгөө боловсруулах, үндэсний хамтын ажиллагааны механизмыг бүрдүүлэх;
• “Боосай карт”-ыг орон даяар түгээх: Телевиз, цахим орчинд сурталчлах, сургалтын хөтөлбөрт нэвтрүүлэх, аж ахуйн нэгж байгууллагуудыг татан оролцуулах замаар арга хэмжээг хэрэгжүүлнэ.

Төсөл хэрэгжсэнээр:

• Иргэдийн гамшгийн эрсдэлийн талаарх мэдлэг, ойлголт бодитоор нэмэгдэх;
• Сайн дурынхны тогтолцоо илүү тогтвортой, зохион байгуулалттай болох;
• “Боосай карт” нь гамшгийн боловсролын үндсэн хэрэглэгдэхүүн, сургалтын хэрэгсэл болон төлөвших зэрэг ач холбогдолтой юм. 

Эх сурвалж: ОБЕГ