Эдийн засаг, хөгжлийн яамны дэргэдэх Хөрөнгө оруулагчдын эрх ашгийг хамгаалах төвд “Уул уурхайн салбарын 7 хоног” үргэлжилж байна. 

Энэ үеэр Аж үйлдвэр, эрдэс баялгийн яамны төрийн нарийн бичгийн дарга Б.Дашпүрэв мэдээлэл өглөө. 

Тэрээр, "Өнөөдөр манай улсад үйл ажиллагаа явуулж буй аж ахуйн нэгжүүд болон салбарын яамны зүгээс Эдийн засаг, хөгжлийн яамны дэргэдэх Хөрөнгө оруулалтын төвөөр дамжуулан хөрөнгө оруулагчдад хууль эрх зүйн орчин, баримтлах бодлогыг тодорхой танилцуулж байна.

Мөн АМГТГ нийт 600 орчим аж ахуйн нэгжийг хамруулан уулын ажлын тайлан, төлөвлөгөөг маш богино хугацаанд баталж өгөх ажлыг хэрэгжүүлж эхэлсэн. Учир нь уулын ажлын төлөвлөгөө батлуулахтай холбоотойгоор аж ахуйн нэгжүүдийн дунд ойлголтын зөрүү, алдаа их гардаг. Үүний улмаас ид ажлын үе болох зургаа, долоодугаар сард тусгай зөвшөөрлөө авч чадаагүй, уулын ажлын төлөвлөгөөгөө батлуулж амжаагүй тохиолдлууд гарч байсан.

Монгол Улсын эдийн засгийг хурдасгаж, бодит орлогыг нэмэгдүүлэхийн тулд бид аж ахуйн нэгжүүдийг богино хугацаанд хүлээн авч, зөвлөн туслах үйлчилгээ үзүүлэн уулын ажлын төлөвлөгөөг нь баталж, холбогдох тусгай зөвшөөрлүүдийг шуурхай олгоно. Ингэснээр аж ахуйн нэгжүүд хөрөнгө оруулагчидтайгаа илүү бодит төлөвлөгөөтэй ярилцаж, төслүүддээ хөрөнгө татах боломж бүрдэнэ.

Үүний үр дүнд дөрөвдүгээр сараас эхлэн ажлууд саадгүй хэрэгжих нөхцөл бүрдэнэ гэж үзэж байна.

Өнөөдөр олон төсөл танилцуулагдаж байна. Үүнд зэс боловсруулах үйлдвэр, Дарханы төмөрлөгийн үйлдвэрт түшиглэсэн жилд 1 сая тонн ган хайлуулах, 200 мянган тонн ширэм боловсруулах төсөл, Багануурын уурхайд суурилсан нүүрс боловсруулах төсөл, мөн алт цэвэршүүлэх үйлдвэрийн төслүүд багтаж байна.

Эдгээр төслүүдийг богино хугацаанд хэрэгжүүлснээр олон мянган ажлын байр бий болж, Монгол Улс эцсийн бүтээгдэхүүн үйлдвэрлэдэг улс болно. Мөн дэлхий нийтийн цэвэр эрчим хүч, хүлэмжийн хийг бууруулах бодлоготой уялдуулан эдийн засгаа төрөлжүүлэх томоохон ажлууд хэрэгжиж байна.

АМНАТ-ын хувьд бид төлбөрийг бууруулах бус, хуваарилалтыг зөв болгох бодлого баримталж байна. Тухайлбал, тухайн төсөл хэрэгжиж буй суманд АМНАТ-ын 20 хувь, аймагт 10 хувийг оногдуулах зохицуулалтыг тусгаж байна. Ингэснээр орон нутгийн иргэд өөрсдийн орчин нөхцөлд тохирсон, аюулгүй, таатай дэд бүтцийг бий болгох боломж бүрдэнэ.

Мөн хариуцлагатай уул уурхайг төлөвшүүлэхийн тулд нөхөн сэргээлт, уурхайн хаалтын асуудлыг сайжруулах шаардлагатай. Төслийг хэрэгжүүлэгч нь геологи, техникийн нөхөн сэргээлт болон уурхайн хаалтыг бүрэн гүйцэтгэх эрх зүйн зохицуулалтыг оруулна. Дараагийн төсөлд шилжих үед тухайн компанийн нөхөн сэргээлтийн чанар, календарчилсан төлөвлөгөөний биелэлтийг харгалзан үзнэ.

Ингэснээр нөхөн сэргээлтгүй орхигддог газар нутгууд үгүй болж, байгаль орчноо хамгаалсан, хариуцлагатай уул уурхай Монголд төлөвшинө. АМНАТ орон нутагтаа зөв хуваарилагдсанаар иргэд уул уурхайн салбарыг дэмжих суурь бүрдэнэ гэж үзэж байна.

Хөрөнгө оруулалтын хувьд Ашигт малтмалын тухай хуулийн шинэчлэлээр дамжуулан итгэлцлийг сэргээж, хөрөнгө оруулалтыг нэмэгдүүлэх зорилготой. Үүнтэй зэрэгцэн Хөрөнгө оруулалтын тухай хууль, Бизнесийн орчныг сайжруулах, Эдийн засгийн эрх чөлөөний тухай хууль зэрэг олон хуулийн төсөл яригдаж байна.

Мөн Ашигт малтмалын тухай, Газрын тосны тухай, Газрын тосны бүтээгдэхүүний тухай, Хүнд үйлдвэрийн тухай хуулиудыг уялдуулж, олборлолтоос баяжуулалт, боловсруулалт хүртэлх үйл явцыг ойлгомжтой, тодорхой болгохоор ажиллаж байна.

Бид аж ахуйн нэгжүүдэд зөвлөн туслах үйлчилгээ үзүүлж, үйл ажиллагааг нь тасралтгүй, доголдолгүй явуулах нөхцөлийг богино хугацаанд бүрдүүлэх нь чухал гэж үзэж байна" гэв.