Засгийн газрын Хэрэг эрхлэх газраас 2026 оны нэгдүгээр сарын 15-ны өдөр аймаг, нийслэлийн ИТХ-ын дарга, Засаг дарга нарын нэгдсэн уулзалтыг зохион байгуулж, үр дүнгийн гэрээнд гарын үсэг зурахаар бэлтгэл ажлыг хангаж байна.

Энэ хүрээнд Ерөнхий сайд Г.Занданшатар Хөвсгөл аймагт ажиллаж байна. Мөн Засгийн газрын гишүүд, аймаг, нийслэлийн ИТХ-ын дарга, Засаг дарга нарт мэдээлэл өгөх цахим хуралд тус аймгаас оролцлоо. Хуралд 21 аймаг, нийслэл, 300 гаруй сум, дүүргийн удирдлагууд оролцож буй. 

Энэ үеэр Ерөнхий сайд Г.Занданшатар хэлэхдээ, "Аялал жуулчлалын алтан гурвалжин гэдэг ойлголт бий болсон. Хөвсгөл, Архангай, Сэлэнгэ, Булганыг хамарсан энэ бүс нутаг нь хөдөө аж ахуйн хувьд ч, аялал жуулчлалын хувьд ч асар их боломжтой бүс гэж бид харж байна. Тиймээс үүнийг аялал жуулчлалын алтан гурвалжин гэж нэрлэж байгаа юм. 

Энэ бүс нутагт асар их хэмжээний валютын орлого оруулах бололцоо бүрдэнэ. Тухайлбал, энэ жил аялал жуулчлалын салбараас 700 сая ам.долларын орлого олсон бол ирэх жил нэг сая жуулчин хүлээн авч, нэг тэрбум ам.долларын орлогыг аялал жуулчлалаас олохоор төлөвлөж байна.

Аялал жуулчлал бол өөрөө нэргүй экспорт. Энэ зорилгыг хангахын тулд Хөвсгөл аймгийн дэд бүтцийн хөгжлийг онцгой анхаарч байна. Тухайлбал, Ханхын чиглэлийн замыг үргэлжлүүлэн барих, Шинэ-Идэрийн чиглэлийн замыг эхлүүлэх, мөн Ханх-Хатгалын чиглэлийн замыг барина. Зүүн талаас нь ч мөн Ханх-Хатгалын чиглэлийн замын төслийг хэрэгжүүлнэ.

Ингэснээр Хөвсгөл аймгийг тойрсон, байгальд ээлтэй, эрүүл эко аялал жуулчлалын цогц бодлого бодитой хэрэгжих нөхцөл бүрдэнэ" гэв.