УИХ дахь АН-ын бүлэг долоо хоног бүрийн ээлжит хуралдаанаа хийлээ. Хурлаас гарсан шийдвэрийн талаар бүлгээс мэдээлэл хийж байна. Хоёр асуудлыг хэлэлцсэн байна. Нэгдүгээрт эрх баригч МАН-ын 2020 оны амлалт. Түүн дотор ногоон хөгжлийн зорилтоо биелүүлсэн эсэхийг хэлэлцэв. Хоёрдугаарт Газрын тухай багц хуулийн төслийг хэлэлцэв.

УИХ-ын гишүүн Н.Ганибал:

"Ногоон хөгжилтэй холбоотой амлалтууд биелсэн үү. МАН агаарын бохирдлыг бууруулна гэж амласан. Гэтэл өнөөдөр нийслэл хотод амьдарч буй хүмүүс агаарын бохирдол ямар хэмжээнд хүрсэн бэ гэдгийг мэдэж буй.

12 аймгийн 35 сумын усны нянгийн хэмжээ зөвшөөрөгдсөн хэмжээнээс хэтэрсэн.

Улаанбаатар хотын иргэд 27 дахин их тоосонцороор амьсгалж байна. Арван хүн тутмын нэг нь агаарын бохирдлын нөлөөгөөр амь насаа алдаж байна гэсэн судалгаа гарсан. Сайжруулсан түлш гэж гаргасан. Гэсэн хэдий ч сайжруулсан түлш үүнд нөлөө үзүүлж чадахгүй байна.

Мөн нийслэлийн хүн амын дийлэнх хувь нь зөөврийн усыг одоог хүртэл хэрэглэж байна. 12 аймгийн 35 сумын усны нянгийн хэмжээ зөвшөөрөгдсөн хэмжээнээс хэтэрсэн" гэв.

УИХ-ын гишүүн Ц.Туваан:

"Газрын тухай хууль нь Үндсэн хуулийн дараа орох маш том, чухал хууль. Өнөөдрийн бүлгийн хуралд тус хуулийн талаар мэдээлэл авлаа. МАН 2020 оны амлалтдаа цөлжилттэй тэмцэнэ гэж заасан. АН-ын бүлэг Газрын багц хуулийн төслөөр олон нийтийн хэлэлцүүлэг зохион байгуулахаар ярьж байна. Учир нь малчид, тариаланчид гэж маш олон хүний эрх ашиг хөндөгдөж байгаа энэ үед эдгээр асуудлыг хэрхэн оруулж ирэх вэ гэдэг асуудлаар салбар яамны төлөөлөл, малчид, тариаланчдын дунд хэлэлцүүлэг өрнүүлнэ.

Мөн газартай холбоотойгоор эрх ашиг нь хөндөгдөж, зөрчигдөж буй иргэдийн төлөөллийг оролцуулна. Газартай холбоотой асуудлаар МАН-ын мөрийн хөтөлбөрт газрыг нөхөн сэргээнэ гэж тусгасан боловч өнөөдрийн байдлаар Монгол Улсын хэмжээнд нийт 30,700 га газар нөхөн сэргээх боломжгүйгээр эвдэрч сүйдсэн" гэлээ.